АҚШ президенти Доналд Трамп Украинага янги етакчи кераклигини айтиб чиққанидан кейин Европанинг йирик давлатлари Украина президенти Володимир Зеленский қўллаб-қувватлашини билдирмоқда.
Германия ТИВ раҳбари Йоҳанн Вадефул Германия Украина ва унинг ҳукумати томонида эканини, «президентни унинг мураккаб вазифаларини бажаришида тўлиқ қўллаб-қувватлаши»ни айтди.
Буюк Британия мудофаа вазири Уэс Стритинг эса шундай деган: «Биз президент Зеленскийни қўллаб-қувватлаймиз». У Лондон «Ғарбнинг Украинани қўллаб-қувватлашдаги қатъияти ва мустаҳкам бирлиги»ни кўришни хоҳлаши ва бунга ҳисса қўшишни ўз бурчи деб билишини таъкидлаган.
Франция президенти Эммануэл Макрон ҳам Париж «Украина ва президент Зеленский томонида қолишда давом этиши»ни айтиб ўтди.
Трамп шанба куни журналистлар билан мулоқот чоғида Зеленский «кўплаб келишувлар тузиши мумкин бўлгани, аммо негадир бундай қилмаётгани»дан шикоят қилди ва Украина «янги президент сайлаши вақти келгани»ни айтди.
Зеленскийнинг ўзи эса бунга жавобан уруш якунланмасидан ҳам янги президентлик сайловлари ўтказишга тайёрлигини билдирди, аммо бунинг учун 60 кунлик сулҳ сўради. У украин халқининг ҳар қандай танловини қабул қилишга тайёрлигини маълум қилган. «Агар президент Трамп чиндан ҳам сайловлар орқали ўзгаришлар бўлишини хоҳласа – мен бу ҳақда унинг жамоасига ҳам айтганман – марҳамат, Путинга етказишсин: бизга икки ой, нафас ростлаш учун 60 кун муҳлат беришсин. Ўт очиш 60 кунга тўлиқ тўхтатилсин – ва биз сайловларни ташкиллаштирамиз», – дея қайд этди Зеленский.
Трамп ва Зеленский ўртасидаги зиддият АҚШ президентининг Киевдан Россиядаги нефтни қайта ишлаш заводлари бўйлаб зарбаларни тўхтатишни талаб қилиши, шунингдек, Вашингтон ва Москва ўртасида Россия дизели экспортига нисбатан жорий этилган санкцияларни юмшатиш бўйича келишув тузилиши фонида диққат марказига чиқди.
Трамп якшанба куни кечқурун Россия ва Украина энергетика сулҳи бўйича келишиб олгани ҳақида эълон қилди. У бу билан нимани назарда тутгани аниқ эмас. Зеленский аввалига Трампнинг сўзлари ўзи учун «янгилик бўлгани»ни айтиб чиқди, аммо кейинроқ Украина қуролли кучларига Трампнинг эълони бўйича «барча тегишли буйруқлар берилгани»ни айтди, аммо бу билан айнан қандай буйруқлар берилганини очиқламади.
Бугун тонгда эса Зеленский Трампнинг баёнотидан кўп ўтмай Россия дронлари Харкивдаги электр станциясига зарба бергани ҳақида маълум қилди. У «Путин Truth Social’ни ўқимаслиги, унинг „шаҳидлари“ бошқа кўрсатмалар бўйича ҳаракат қилгани» ҳақида гапирди. Зеленский Украина Россия зарбаларига жавоб қайтаришига тўғри келишидан огоҳлантирган.
