Володимир Зеленский Украина қуролли кучлари 11 октябр куни Доналд Трамп эълон қилган энергетика сулҳи билан боғлиқ «барча тегишли буйруқларни олгани»ни айтди.
Украина қуролли кучларига айнан қандай буйруқ берилгани – очиқланмаган. Аммо Зеленский Украина «ўт очишни тўхтатиш ва урушни якунлашнинг барча реал ва ишончли форматларини қўллаб-қувватлаши»ни тасдиқлаган.
«Украина Россия энергетикасига зарба бермасликка тайёр ва Россия ҳам худди шу нарсага тайёр эканига ва АҚШ президентининг бу масала бўйича келишувга эришишига умид қиламиз», – деган Зеленский ўзининг кечқурунги видеомурожаатида.
У Украина вазиятни юмшатиш учун кўплаб қадамлар таклиф қилгани, аммо Путин «бунинг барчасига ўзининг биргина сўзи: „йўқ“» билан жавоб қайтарганини айтган. «Қаттиқ умид қиламизки, у ниҳоят Америка, Украина ва бутун дунёга бошқа нарсани айтади», – дея қўшимча қилган Зеленский.
Шу билан бирга, Украина президентининг айтишича, Россия кун давомида Украина энергетика объектларига ҳужум қилишда давом этган, мурожаат арафасида эса Харкивдаги 5-сонли иссиқлик электр станциясига зарба берилган.
Россиядагилар Трамп томонидан анонс қилинган энергетика сулҳи юзасидан муносабат билдирмади. Давлат думасининг энергетика бўйича қўмитаси раиси ўринбосари Игор Ананских «Осторожно, новости» телеграм-канали билан суҳбатда «Трамп тез-тез нефт нархи кўтарилиб кетмаслиги учун нимадир деб туриши»ни қайд этган. «Бу сўзлар орқали инвестиция дейилади. Бу қанчалик ҳақиқатга тўғри келишидан хабарим йўқ», – дея қўшимча қилган у.
