Newsweek (АҚШ) янгиликлар журнали Украинанинг навбатдаги президенти лавозимига даъвогарлик қилиши мумкин бўлган тўрт нафар сиёсатчининг номини келтирди. Нашр ушбу рўйхатни АҚШ президентининг Украинада янги сайлов ўтказишга чақириғи фонида тузган.
Newsweek рўйхатида:
Валерий Залужний. Украина Қуролли Кучларининг собиқ бош қўмондони, ҳозир Украинанинг Буюк Британиядаги элчиси;
Кирилл Буданов. Украина ҳарбий разведкасининг (ГУР) собиқ раҳбари, ҳозир Украина президенти офиси раҳбари;
Михаил Фёдоров. Рақамлаштириш ва собиқ мудофаа вазири. Ҳозир истеъфода;
Пётр Порошенко. Украинанинг бешинчи президенти, мухолифатдаги «Европа бирдамлиги» партияси етакчиси.
10 октябрь куни АҚШ етакчиси Доналд Трамп Украинада янги сайлов ўтказиш таклифини илгари сурди ҳамда Володимир Зеленскийни АҚШга зарар етказиш ниятида эканликда айблади.
«Мен келишув туза оладиган янги етакчини топишни таклиф қиламан. Чунки у кўплаб битимлар тузиши мумкин эди, аммо негадир ҳеч қачон бундай қилмади», — деди АҚШ етакчиси.
Эртаси куни Зеленский ABC News телеканалига берган интервьюсида, агар Россия 60 кунга ўт очишни тўлиқ тўхтатишга рози бўлса, Украина президентлик сайловини ташкил этишга тайёрлигини билдирди. Кремль буни рад этди ва фақат сайлов куни ҳужумларни тўхтатишга тайёр эканини маълум қилди.
Украинада президентлик сайлови 2024 йил март ойи охирида бўлиб ўтиши керак эди, бироқ ҳарбий ҳолат жорий этилгани сабабли ўтказилмади. Ўша йилнинг май ойида Зеленскийнинг беш йиллик ваколат муддати тугади. Ўшандан бери Москва уни нолегитим президент деб ҳисоблайди.
Европа Иттифоқи, БМТ ва АҚШ Давлат департаменти эса ваколат муддати тугаганига қарамай, Зеленскийни президент сифатида тан олишда давом этмоқда.
