Путин ноқонуний мигрантларга Россияни тарк этиш учун муҳлат берди

Россия президенти Владимир Путин ноқонуний мигрантларнинг Россия бўлишини тартибга солиш бўйича вақтинчалик чора-тадбирлар тўғрисидаги фармонни имзолади.

Ҳужжатга кўра, Россияда ноқонуний бўлиб турган мигрантлар 2025 йил 30 апрелга қадар мамлакатни мустақил равишда тарк этиши ёки ҳолатини қонунийлаштириши керак.

Фармонда белгиланишича, ўз ҳолатини қонунийлаштирмоқчи бўлган мигрантларга қуйидаги талаблар қўйилади:

- шахсий биометрик маълумотларини топшириш ёки шахсий биометрик маълумотлар асосида идентификациядан ўтиш;

- наркотик ёки психотроп моддаларни истеъмол қилмаганини, ОИТС ёки тегишли рўйхатдаги бошқа юқумли касалликларга чалинмаганини тасдиқлаш учун тиббий кўрикдан ўтиш;

- рус тили, Россия тарихи ва қонунчилиги бўйича имтиҳон топшириш;

- мажбурий тўловлар бўйича қарзни ўз ихтиёри билан тўлаш;

- патент, меҳнат қилиш, вақтинча яшаш учун рухсатнома, ўқиш ёки яшаш учун рухсатнома беришни рад қилиш учун асос йўқлиги ва бошқа талаблар.

Қонун 2025 йил 1 январдан кучга киради.

2024 йилда Россияда миграция сиёсатини кучайтирувчи бир қанча қонунлар қабул қилинди. Улардан бирига кўра, 2025 йил 5 февралдан мамлакатда депортация учун миграция режими жорий этилади. Ички ишлар вазирлиги суд қарорисиз ноқонуний мигрантларни чиқариб юбориш ҳуқуқига эга бўлади.