Москвадаги теракт: 11 киши қўлга олинди

Федерал хавфсизлик хизмати директори Александр Бортников президент Путинга террорчилар қўлга олингани ҳақида маълумот берди.

Фото: Дума депутати Александр Хинштейннинг Telegram-канали

РФ президент матбуот хизмати Crocus City Hall’да терактга бевосита алоқадор 4 террорчи қўлга олингани ҳақида маълум қилди.

Қайд этилишича, терактда гумонланиб, жами 11 киши қўлга олинган — улардан 4 нафари бевоситда Crocus City Hall’даги ҳужумда иштирок этган, дейилади баёнотда.

Россия Давлат думаси депутати Александр Хинштейн терактда гумонланаётганлар қочган Renault автомобили Брянск вилоятининг Хатсун қишлоғи ҳудудидан топилганини маълум қилди. Унга кўра, гумондорларнинг бири машина билан бирга қўлга олинган, яна бири эса ўрмон ҳудудида ушланган.

Хинштейнга кўра, Renault салонидан “ПМ” тўппоначаси, “АКМ” автоматининг ўқдони ва Тожикистон фуқароларининг паспорти топилган.

Маҳаллий ОАВ бунгача терактда гумонланаётганлар Тожикистон фуқаролари экани ҳақида ёзди. Тожикистон ТИВ эса республика фуқароларининг терактга алоқадорлиги ҳақида Россия томонидан расмий хабар олмагани ҳақида баёнот бериб, оммавий ахборот воситаларини расмий манбаларга таянишга чақирди.

Россия Тергов қўмитаси маълумотларига кўра, айни дамда теракт қурбонлари сони 93 кишига етган. Москва мэри Сергей Собянин терактдан жабр кўрганларга 500 мингдан 3 млн рублгача моддий кўмак берилишини маълум қилди.

#Москва #Крокус Сити Ҳолл

Россиянинг Москва вилояти, Красногорск шаҳридаги «Крокус Сити Холл» концерт залида отишма юз берди. Маҳаллий ОАВ хабарларига кўра, номаълум шахслар автомат милтиқдан одамларга қарата ўқ узган.