Навоийда мактаб ўқувчилари бошқарувидаги машина ЙТҲга учради

Ҳодиса Кармана туманида содир бўлган. ЙТҲ оқибатида 16 ёшли йигит вафот этган. Яна бир ўқувчи шифохонада қолмоқда.

Фото: Видеодан кадр

Кармана туманида мактаб ўқувчилари иштирокида ЙТҲ содир бўлди. Бу ҳақда Навоий вилояти ИИБ ЙҲХБ ахборот хизмати хабар берди.

Маълум бўлишича, ЙТҲ 22 апрел куни соат 21:00 лар атрофида туманнинг Малик маҳалласи ҳудудида содир бўлган. Ичида Ҳазора қишлоғидаги 22-умумтаълим мактабининг икки ўқувчиси бўлган Cobalt йўлдан чиқиб кетган.

ЙТҲ оқибатида 9-синф ўқувчиси И.Ҳ. шифохонада вафот этган. 11-синф ўқувчиси эса тан жароҳати олиб, шифохонага ётқизилган.

Навоий вилояти ИИБ ЙҲХБ мактабда юқори синф ўқувчилари иштирокида муҳокама йиғилиши ўтказган.

Kun.uz’нинг аниқлик киритишича, машина шифохонадаги ўқувчининг отасига тегишли бўлган. Бироқ у рулни шеригига берганини айтмоқда. Машинани ким бошқарганини аниқлаш учун экспертиза тайинланиши мумкин.

Аввалроқ Навоийда ЙТҲ оқибатида 5 киши ҳалок бўлганди.