Жиноят ишлари бўйича Денов туман суди собиқ раиси ўзига қарши суддан яширинди. У сиртдан қамоққа олиниб, қидирувга берилди

Жиноят ишлари бўйича Қарши шаҳар суди жиноят ишлари бўйича Денов туман судининг собиқ раиси Камолиддин Муродовга қамоқ эҳтиёт чорасини қўллаш ва қидрув эълон қилиш ҳақида ажрим чиқарди.

Ҳужжатда келтирилишича, Жиноят кодексининг 266-моддаси 2-қисми (транспорт воситаларидан фойдаланиш хавфсизлиги қоидаларини бузиш одам ўлимига сабаб бўлиши) билан айбаланётган Камолиддин Муродов огоҳлантирилишига қарамай навбатдаги суд мажлисига келмаган. 13 декабрда уни судга мажбурий келтириш бўйича ажрим эълон қилинган.

Камолиддин Муродов яшаш манзили – Самарқанд вилояти Тойлоқ тумани Жалолобод маҳалласидаги уйида ҳам йўқлиги аниқланган. Маҳалла ходимлари томонидан тузилган далолатномада Муродов “даволанаётганлиги сабабли уйида йўқ”лиги маълум қилинган.

Жиноят ишини унинг иштирокисиз кўриб чиқиш ва мазмунан ҳал қилиш имконияти йўқлиги сабабли Камолиддин Муродовга нисбатан қидирув эълон қилинган. У топилганидан сўнг муносиб хулқ-атворда бўлиш ҳақидаги эҳтиёт чораси ўзгартирилиб, қамоққа олиниши ҳамда Қарши шаҳар 5-тергов ҳибсхонасига этап қилиниши белгиланган. Собиқ суд раиси топилгунга қадар унга нисбатан кўрилаётган жиноят иши ҳаракатдан тўхтатилган.

Собиқ суд раиси жорий йил 9 март куни адвокат таниши билан ЙТҲга учраган. Бунинг оқибатида адвокат оғир тан жароҳати олиб, воқеа жойида вафот этган.

Kun.uz ихтиёридаги ҳужжатда келтирилишича, Камолиддин Муродов айбига умуман иқрорлик билдирмаган ҳамда машина бошқарувида ўзи бўлганлигини рад қилган. Аммо тайинланган одам ДНКси суд-биологик экспертизаси рулда у бўлганлиги тасдиқланган.

“Камолиддин Муродов ва укам бир-бирлари билан яхши таниш эди. Воқеа содир бўлган куни суд раиси ўз хизмат машинасида укамнинг уйига келган. Кейин улар укамга тегишли Lacetti машинасида қаергадир чиқиб кетишган.

Ортга қайтишда машина йўлдан чиқиб кетиб, дарахтга урилган. Бунинг оқибатида укам ҳалок бўлди. Гувоҳларнинг айтишича, ЙТҲ пайтида машина рулида судя бўлган, адвокат укам эса олд йўловчи ўриндиғи томондан ташқарига отилиб чиқиб кетган. Албатта, рулда ким бўлганлиги тергов жараёнида аниқланади. Биз ҳақиқат қарор топиши тарафдоримиз. Сабаби, укамнинг тўрт фарзанди етим қолди”, деганди олдинроқ марҳум адвокатнинг Kun.uz мухбири билан суҳбатлашган опаси.

Камолиддин Муродов 2021 йил апрел ойида 5 йил муддатга жиноят ишлари бўйича Денов тумани суд раиси лавозимига тайинланган ва 2024 йил 15 майга қадар ушбу лавозимда ишлаган. Унинг ваколатлари ўтказилган хизмат текшируви натижалари бўйича муддатидан олдин тугатилган.