Қоидабузарлик учун жавобгарликни бошқа шахсга ўтказиш хизмати my.gov.uz порталида ишга туширилди. Мақолада буни амалга ошириш тартиби, қайси қоидабузарликка неччи балл берилиши ва жарима баллари қандай ҳисобланиши билан танишасиз.
Қандай амалга оширилади?
my.gov.uz порталида ўз шахсий кабинетингизга кирасиз.
Сўнгра қидирув бўлимига хизмат номини ёзиб, уни танлайсиз.
Шундан сўнг хизмат саҳифаси очилади. Бу ерда “хизматдан фойдаланиш” тугмасини босасиз.
1-қадамда “кейингиси” тугмасини босиш орқали оммавий оферта талабларини қабул қилган бўласиз.
2-қадамда онлайн ариза сўровномаси шакллантирилади. Ариза берувчи унда жавобгарликни ўз зиммасига олувчи ҳайдовчининг шахсини тасдиқловчи ҳужжат маълумотларини, муддатни кўрсатади. Электрон ишончнома ва суғурта маълумотлари автоматик равишда текширилади. Агар машина бош ишончнома асосида бошқарилаётган бўлса, унинг электрон нусхаси сўровномага илова қилинади.
Шундан сўнг “юбориш” тугмаси босилади. Ҳайдовчи my.gov.uz профилидаги “Хабарномалар” бўлимига кириб, аризани электрон рақамли имзо, Mobile-ID ёки Face-ID орқали тасдиқлайди. Сўровнома тасдиқлангач, белгиланган тўлов амалга оширилади ҳамда маълумотлар автоматик равишда Йўл ҳаракати хавфсизлиги хизмати ахборот тизимига юборилади.
Қоидабузарлик учун жавобгарликни бошқа шахсга ўтказишни Жамоат хавфсизлиги департаменти Йўл ҳаракати хавфсизлиги хизматининг мобил иловаси орқали ҳам амалга ошириш мумкинлиги билдирилган.
Хизмат нархи қанча?
Ушбу хизмат учун БҲМнинг 10 фоизи (41 200 сўм), ариза my.gov.uz орқали топширилганда эса 9 фоизи миқдорида (37 080 сўм) йиғим ундирилади.
