Uzum Market устун мавқега эга деб топилди

Рақобат қўмитаси Uzum Market онлайн дўкони устун мавқега эга деб топилганини эълон қилди. 

Маълум қилинишича, Вазирлар Маҳкамасининг 2024 йил 1 майдаги тегишли қарори иловаси билан тасдиқланган Рақамли платформа операторининг устун мавқейини ва устун музокара кучини эътироф этиш тартиби тўғрисидаги Низомда рақамли платформа операторини устун мавқега эга деб эътироф этишнинг мезонлари белгиланган.

Ушбу қарорга мувофиқ, Рақобат қўмитасининг тегишли буйруғи билан электрон савдо майдончалари (маркетплейслар) бозорида «UZUM MARKET» МЧЖ устун мавқега эга рақамли платформа оператори сифатида эътироф этилди.

Маълумот учун, устун мавқе бу – товар ёки молия бозорида хўжалик юритувчи субъектнинг ёхуд шахслар гуруҳининг рақобатлашувчи хўжалик юритувчи субъектларга боғлиқ бўлмаган ҳолда унга ўз фаолиятини амалга ошириш ва рақобатнинг ҳолатига ҳал қилувчи таъсир кўрсатиш, тегишли бозорга бошқа хўжалик юритувчи субъектларнинг киришини қийинлаштириш ёхуд уларнинг иқтисодий фаолият эркинлигини бошқача тарзда чеклаш имкониятини берадиган ҳолат.