АҚШда ит ёнғин вақтида гўдакни сақлаб қолиш учун ўз жонини қурбон қилди

8 ойли гўдак АҚШнинг Балтимор шаҳрида чиққан кучли ёнғиндан омон қолди. Уни ўз танаси билан тўсган Поло лақабли ит сақлаб қолган.

CBS News телеканали маълумотига кўра, қизчанинг онаси бўлмиш Эрика Поремски ёнғин бошланганида уйга кира олмаган. Бунга уринганида қўлини куйдириб олган.

У ўт ўчирувчиларни чақирган ва уларни кутишга мажбур бўлган.

Бола бу вақтда уйнинг иккинчи қаватида бўлган. Ўт ўчирувчилар етиб келиб, у ётган хонани очиб киришганида Вивиан Полонинг остида тирик ҳолатда бўлган. Жониворнинг ҳаётини сақлаб қолишнинг иложи бўлмаган.