WikiLeaks: Ҳиллари Клинтон Путин ҳақида ижобий фикрда

АҚШ президентлиги учун Демократик партия номзоди Ҳиллари Клинтон Россия президенти Путинга қарши туриши ҳақида кўп бора таъкидламоқда. Бироқ, у бундан аввал Россия давлат раҳбари ҳақида бир неча маротаба ижобий фикрларни билдирган, деб хабар қилмоқда Fox News телеканали WikiLeaks сайти ошкор қилган маълумотларга асосланган ҳолда.

Хусусан, Клинтон сайловолди кампанияси раҳбари Жон Подестанинг мактубларида ёзилишича, 2013 йил июнь ойида Goldman Sachs банки раҳбарияти олдида чиқиш қилишидан аввал, Клинтон хоним РФ президенти билан янада қалин алоқада бўлишга умид билдирган. Бу вақтда у Давлат котиби лавозимини тарк этган эди. 

Ўша йилнинг май ойида Ҳиллари Sanford Bernstein консалтинг компанияси топ менежерлари билан учрашувда Путинни «ажойиб суҳбатдош» деб атаган. 

2013 йил октябрь ойида Чикаго бирлашган яҳудийлар жамғармасида маъруза қилган собиқ давлат котибининг фикрича, Россия президентини олдиндан нима қилмоқчи эканини айтиб бўлмайди. «Унинг нима қилмоқчи ёки демоқчи эканига ҳеч қачон юз фоиз ишониш қийин. Биласизми, у Она ватанини ҳимоя қилишга тайёр. Шу боисдан ҳам бизда қизиқарли суҳбатлар бўлиб ўтган», — деган эди Клинтон хоним. 

Жон Подестанинг WikiLeaks сайти томонидан ошкор қилинган мактубларининг навбатдаги қисмида, шунингдек, Клинтоннинг Путин дачасига ташриф буюргани ҳақидаги ҳаяжонли ҳикояси ҳам эълон қилинган.