Швециянинг суперкарлар ишлаб чиқаришга ихтисослашган Koenigsegg компанияси бўлғуси Женева автокўргазмасидаги бурчагида намойиш этиладиган маҳсулотлари ҳақида ҳикоя қилди. Швеция компанияси кўргазмада Agera RS моделининг махсус моделини намойиш этади. Agera RS Gryphon деб номланган намунаси 1360 от кучига эга двигатель билан жиҳозланади ва экстерьерига 24-каратли олтин (999,5) билан ишлов берилади.
Фирма махсус Agera RS моделини бизнесмен ва автомобиль коллекционери Мэнни Хошбин буюртмаси асосида ишлаб чиққан. У кузовнинг ташқи томонидан «карбонли» кўринишини сақлаб қолишни ҳамда бир нечта олтин элементларини жойлашни, хусусан Koenigsegg тимсоли, кузовдаги безак бўртмалари ва тўсиқ вставкалари олтиндан бўлиши кераклигини айтган.
Бундан ташқари, мижоз учун махсус ишлаб чиқилган карбонли бош кийим ва суперкар салонига ҳам олтин билан ишлов берилган. Шу билан бирга алькантара ва карбондан фойдаланилган.
Хошбин буюртмасига кўра, Аgera RS Gryphon’га 1 мегаваттлик V8 твин турбо ўрнатилади. Айни двигателни Koenigsegg One: 1 гиперкарида ҳам қўллайди. Янги Аgera RS вазни 1395 кгни ташкил этган.
Koenigsegg махсус машинасидан ташқари Женевага илк маротаба Regera моделини ҳам келтиради. Унга 1500 от кучига эга гибрид қурилма ўрнатилади. Янги Koenigsegg соатига 300 км тезликка атиги 10 сонияда эришади.
Regera модели икки нусхасининг ички ва ташқи кўринишларига мижозлар буюртмасига кўра, турлича ишлов берилган.
