Янги iPhone ҳақида янги маълумотлар ошкор этилди

Apple компанияси OLED-дисплейли 5,8 дюймли iPhone 8 қурилмасини ишлаб чиқаришни режалаштирмоқда. Бу ҳақида Nikkei Asian Review хабар берди. 

"Жорий йилнинг куз ойларида тақдим этиладиган янги iPhone уч конфигурацияда ишлаб чиқарилади - LCD-дисплейли икки модель ва OLED-экранли, 5.8 дюймли бир модель", - дейилади таҳлилчиларнинг ҳисоботида. Бундан аввал Nikkei манбалари телефоннинг тўнғич модели 5,5 дюйм экранга эга бўлиши ҳақида маълумот берганди. 

Nikkei билан бир қаторда KGI Securities таҳлилчилари ҳам шундай хабар билан чиқишган. Унга кўра, Apple флагмани дисплейининг асосий соҳаси 5,15 дюймдан иборат. Экран остидаги қолган "майдон"ни "функционал зона" эгаллаган, унда виртуал тугмалар ва бармоқ излари сканери жойлашган. Бу икки экран биргаликда 5,8 дюйм диагоналга эга.