Хитойда жуда йирик олтин кони топилди

Хитой тарихидаги энг йирик (382 тонналик захирага эга) олтин кони мамлакат шарқидаги Шаньдун вилоятида топилди. Бу ҳақда China News агентлиги хабар бермоқда.

Аниқлик киритилишича, кон захираси 22 миллиард долларга баҳоланмоқда.

Қимматбаҳо металл захираси икки километрлик масофага қадар чўзилган бўлиб, қатлам қалинлиги 67 метрга тенг. Жинсдаги олтин бир тоннага 4,52 граммни ташкил этади.

Агентликнинг таъкидлашича, кон ҳар куни 10 минг тоннани қазиб олган ҳолда фаолият кўрсатса, тўла қувват ва муаммоларсиз 40 йил давомида ишлаши мумкин.