Британия парламенти киберҳужумга йўлиқди

Фото: Reuters

Буюк Британия парламенти унинг серверлари хакерлар ҳужумига йўлиққанини тасдиқлади. Бунинг натижасида икки палатанинг ҳам баъзи аъзолари ўзларининг почталарига кира олишмаган. Бу ҳақида мамлакат парламентининг Twitter'даги расмий саҳифасида маълум қилинди.

"Биз парламент тармоғи фойдаланувчилари аккаунтларига рухсатсиз киришга уриниш ҳолатларини аниқладик ва ҳозирда Миллий киберхавфсизлик хизмати билан узвий ҳамкорликда бу воқеани ўрганмоқдамиз", - дейилади хабарда.

Шунингдек унда эҳтиёткорлик чораси сифатида парламент тармоғи аккаунтларига масофадан кириш вақтинчалик ёпилгани ҳам маълум қилинган. Бир неча парламентарийлар ўз почталарига кира олмаётганликларини тасдиқлашган.