Қатар ҳукумати Кувайт вакили орқали Саудия Арабистони ташқи ишлар вазири Одил ал-Жубайрга аввалроқ бир қатор араб давлатлари Доҳага қўйган ультиматумга жавоб берди. Бу ҳақда Al Arabia телеканали хабар бермоқда.
Таъкидланишича, Кувайтнинг ахборот вазири Муҳаммад Абдуллоҳ ал-Муборак ас-Сабоҳ саудиялик ҳамкасби билан Жиддада учрашган.
Аввалроқ Қатар ташқи ишлар вазири Муҳаммад бин Абдулраҳмон Ол Соний Доҳанинг араб давлатлари талабларига расмий жавобини топшириш учун Кувайтга келганди.
23 июнда Кувайт Қатарга 4 араб давлатининг талаблари рўйхатини тақдим қилганди. Араб давлатлари муносабатлар нормаллашиши учун Доҳадан бу талабларнинг барчасини 5 июлгача бажаришни талаб қилганлар.
Ўз навбатида Саудия Арабистони, БАА, Баҳрайн ва Миср Қатар талабларга жавобини бергани ҳақидаги ахборотни тасдиқлашган.
"4 араб давлати ультиматум муддати тугаши олдидан Кувайт орқали Қатардан жавоб олишди. Биз томондан жавоб қулай вақтда берилади", дейилган хабарда.
