Яманнинг «Ансоруллоҳ» исёнчи ҳаракати (ҳусийчилар) Саудия Арабистони Мудофаа вазирлигининг Ар-Риёдда жойлашган биносига ракета зарбаси берганини эълон қилди. Бу ҳақда ҳусийчиларнинг ҳарбий қаноти вакили, бригада генерали Яҳё Сориа хабар берди. Унинг таъкидлашича, баллистик ракета аниқ бориб нишонга теккан.

Бундан ташқари, ҳусийчилар Саудия Арабистонининг жануби-ғарбидаги Абҳа халқаро аэропортига дрон ёрдамида ҳужум уюштиргани, бунинг оқибатида авиақатновлар издан чиққани ҳақида маълум қилди. Шунингдек, Рас-Таннурадаги нефтни қайта ишлаш заводи ҳам ўққа тутилган.

Саудия Арабистони бошчилигидаги араб коалицияси ҳусийчилар томонидан Ар-Риёд томон учирилган иккита баллистик ракета уриб туширилгани ҳақида хабар берди. Саудия Арабистони фуқаро мудофааси бошқармаси маълумотларига кўра, ракета парчалари бино, қурилаётган объект ва автомобилга зарар етказган, шу билан бирга, қурбонлар ва жароҳатланганлар ҳақида маълумот йўқ.

Ҳусийчилар, шунингдек, Нажрон шаҳри аэропортида ва Хамис-Мушайт авиабазасида жойлашган иккита ҳарбий-транспорт самолётига баллистик ракеталар билан зарба берганини маълум қилиб, ҳужумлар белгиланган нишонларга етиб борганини таъкидлади.