Раҳбариятдаги алмашинув ҳақида август охирида Financial Times хабар берган. Компаниянинг расмий сайтида ҳам ҳозир раҳбар сифатида Баракат кўрсатилган.

У New Murabba’ни 2024 йил январидан бошқариб келган Майкл Дайк ўрнини эгаллаган. Компания маълумотига кўра, Баракат кўчмас мулк ва йирик шаҳарсозлик лойиҳаларида 35 йилдан ортиқ тажрибага эга.

У Саудия Арабистони Давлат инвестиция жамғармасида раҳбарлик лавозимида ишлайди, аввал ROSHN компаниясини вақтинча бошқарган. Шунингдек, New Murabba ташкил этилаётган босқичда ҳам унга раҳбарлик қилган.

Январ ойида Reuters манбаларига таяниб, «Мукааб»да тупроқ қазиш ва қозиқлар ўрнатишдан ташқари ишлар тўхтатиб турилганини ёзган эди. Агентликка кўра, ҳукумат лойиҳанинг молиялаштирилиши ва амалга ошириш имкониятларини баҳолаётган, атрофдаги ҳудудни ривожлантириш эса давом эттирилиши кутилган.

Май ойида компания қарийб 15 миллион куб метр тупроқ қазиб олингани ва 1200 та қозиқ ўрнатилганини маълум қилган. Бу натижалар пойдеворни тайёрлаш ишларига тегишли. Улар бинонинг ер усти қисми қачон барпо этилиши ёки мажмуа қачон очилишини аниқлаштирмайди.

New Murabba’нинг амалдаги тақдимотида «Мукааб» ҳамон 400 метрлик улкан меъморий объект сифатида кўрсатилмоқда. Унинг ичида савдо майдонлари, меҳмонхоналар, турар жойлар, панорама томоша қилиш нуқталари ва маданий объектлар жойлаштирилиши режалаштирилган. Тарқатилаётган тасвирлар тайёр бинонинг фотосуратлари эмас, келажакдаги мажмуанинг компьютерда яратилган кўринишларидир.

Лойиҳанинг янги босқичидаги амалий келишувлардан бири Almana Medical Group билан ҳамкорлик бўлди. 25 августда эълон қилинган хабарга кўра, New Murabba ҳудудида умумий йўналишдаги шифохона учун тахминан 1 миллиард Саудия риали инвестиция киритиш режалаштирилган.

Тиббиёт муассасасига шаҳзода Турки ибн Абдулазиз ал-Аввал йўли яқинидан 16 минг квадрат метрдан ортиқ ер ажратилиши кўзда тутилган.

Шифохона 200 ўринга мўлжалланган. Унда шошилинч тиббий ёрдам, травматология, оилавий тиббиёт, педиатрия, неонатология, ортопедия, кардиология ва асаб тизими касалликлари бўйича хизматлар ташкил этилиши кутилмоқда.

«Бу инвестициявий ҳамкорлик — келгуси ойларда эълон қилишни режалаштираётган кўплаб келишувларимизнинг биринчиси», — деган Сабоҳ Баракат.