Ўзбекистон Мудофаа вазири Қобул Бердиев лавозимини тарк этди. Бу вазирликни собиқ Ички ишлар вазири Абдусалом Азизов бошқаради.
Мудофаа вазирлигидан «Kun.uz»га маълум қилишларича, генерал-полковник Қобул Бердиев энди Ўзбекистон Республикаси Қуролли кучлари академиясига раҳбарлик қилади.
Қобул Бердиев 2008 йилдан буён Мудофаа вазири эди. У Қуролли кучлардаги фаолиятини 1976 йилдан бошлаган. 1998-2000 йилларда Ўзбекистон Республикаси Қуролли кучлари Бош штаби бошлиғи ўринбосари, 2000-2003 йилларда Ўзбекистон Республикаси Қуролли кучлари Бирлашган штаби бошлиғининг ўринбосари. 2003-2006 йилларда Тошкент олий умумқўшин қўмондонлик билим юрти бошлиғи. 2006-2008 йилларда Ўзбекистон Республикаси Фавқулодда вазиятлар вазири. 2008 йилда Ўзбекистон Республикаси Мудофаа вазирининг ўринбосари - Жанубий-ғарбий махсус ҳарбий округ қўшинлари қўмондони. 2008 йил сентябридан бошлаб, Ўзбекистон Республикаси Мудофаа вазири.
Бундан олдинроқ Ички ишлар вазирлигида Абдусалом Азизов ўрнини Хоразм вилояти ҳокими Пўлат Бобожонов эгаллагани маълум бўлганди
