«Яндекс» компаниясида ишлашни хоҳловчилар учун танлов эълон қилинди. «Яндекс.Блиц»да истаган одам иштирок этиши мумкин - танлов тармоқнинг ўзида йўлга қўйилади. "Лайфхакер" шу ҳақида хабар берди.
Манбага кўра, танлов икки босқичдан иборат бўлади: ҳар бири олтитадан вазифани ўз ичига олади, уларга жавоб бериш учун тўрт соат вақт берилади. Танловнинг биринчи раунди 18-24 сентябрь кунлари бўлиб ўтади - унда ўзингизга қулай бўлган вақтда қатнашишингиз мумкин. Иккинчи раундга 30 сентябрда старт берилади. Унда иштирок этиш учун тўрт вазифани бажариш керак бўлади.
«Яндекс.Блиц» иштирокчилари вазифаларни бажариш учун алгоритмлар ўйлаб топиши ва уларни кодларда ифодалаши керак бўлади. Жавоблар C++, Java, Python ва C# - компания ходимлари ишлайдиган тилларида қабул қилинади.
Финалчилар совринли ўринлар учун 100, 75 ва 50 минг рубль билан тақдирланади. Шу билан бирга, энг яхши 20 нафар иштирокчига сертификатлар берилади. Барча вазифаларни бажара олмасангизу, бироқ яхши натижалар кўрсатсангиз ҳам беллашувни кузатиб бораётган компания ходимлари сиз билан боғланишлари мумкин.
Биринчи раунд натижалари 26 сентябрь куни эълон қилинади, финалчилар номи эса 4 октябрда маълум бўлади.
