«Дунё» ахборот агентлиги хабарига кўра, бу масалалар Ўзбекистоннинг Япониядаги элчихонасида Proud Partners компанияси раҳбарияти билан ўтказилган учрашувда муҳокама қилинган.
Музокараларда Ангрен шаҳрида фаолият юритаётган Uzbekistan Proud Academy — UPA маркази доирасидаги ҳамкорликни кенгайтиришга эътибор қаратилган. Хусусан, ўзбекистонлик ёшларга япон тили ва зарур касбий кўникмаларни ўргатиш, кейинчалик уларни Японияда ишга жойлаштириш масалалари кўриб чиқилган.
Режалаштирилаётган ташриф давомида япон иш берувчилари марказ фаолияти ва ўқув инфратузилмаси билан танишиши, шунингдек, келгусида Японияда ишлаш учун номзодларни танлаш бўйича суҳбатлар ўтказиши кутилмоқда.
Ҳамкорлик ўзбекистонликларнинг Японияда ишга жойлашиш имкониятларини кенгайтириш, иш берувчилар билан бевосита алоқаларни мустаҳкамлаш ва транспорт-логистика соҳаси учун малакали кадрлар тайёрлашга қаратилган.
Хабарда саралаш суҳбатларининг аниқ санаси, номзодларга қўйиладиган талаблар ва ариза топшириш тартиби келтирилмаган.
