Путин: Сурия бўйича келишувлар Россия ва Туркиянинг умумий ютуғидир

Фото: Reuters

Россия президенти Владимир Путиннинг баёнот беришича, Сурия бўйича эришилган келишувлар Россия ва Туркиянинг умумий ютуғидир. У бу ҳақда туркиялик ҳамкасби Ражаб Тоййиб Эрдўған билан учрашув натижаларига бағишланган матбуот анжуманида сўз юритди, деб хабар қилмоқда РИА Новости.

«Қийинчиликларга қарамай, биз ижобий натижага эриша олдик. Бу келишувларни умумий ютуғимиз деб ҳисоблайман. Бу албатта дўстимиз Эрдўғаннинг ҳам ютуғидир», — деган Путин.

Унинг сўзларига кўра, Сурияда «ўзаро биродаркушлик урушига барҳам бериш учун барча шароитлар мавжуд».

Путиннинг қайд этишича, террорчиларни батамом йўқ қилиш ва Сурия аҳолисининг тинч ҳаётга қайтиши нафақат Сурия аҳолиси, балки бутун дунё учун жуда муҳимдир.

«Биз қочқинларнинг ўз уйларига қайтиши учун шароит барпо қилаяпмиз, бу Сурия бўйича Женева музокараларида узоқмуддатли сиёсий йўл билан ҳал этиш жараёнини бошлаш имконини беради», — деган у.