Ё ҳаёт ё мамот! Ҳал қилувчи баҳслар остонасида

ЖЧ-2018 саралаш ўйинлари ҳам ўзининг ҳал қилувчи палласига кириб бормоқда. Баъзи гуруҳларда ҳаммаси ҳал бўлиб, фақат ноябрь ойидаги плей-оффлар ҳақида ўйлаётган бўлишса, баъзи гуруҳларда ҳаёт қайнаяпти. Айниқса, йўлланма масаласини ўзаро ўйинларда ҳал қилаётган рақиблар борки, Tribuna.uz уларга алоҳида эътибор қаратишни лозим топди. 

ПОРТУГАЛИЯ – ШВЕЙЦАРИЯ (10 октябрь, 23:45)

Гуруҳдаги бошқа жамоалар билан юз фоизлик натижа кўрсатиб келаётган бу икки жамоа барча масалани ўзаро ўйинда ҳал этишади. Яъниким, Криштиану Роналдунинг аҳволи аслида Мессиникидан яхшироқ эмас. Мезбонлар бу ўйинда ғалаба қозонишлари шарт, шу ҳолдагина Европа чемпионлари тўғридан-тўғри мундиал иштирокчисига айланишлари мумкин. Акс ҳолда Португалия плей-оффда тўп суради: у ерда рақиб Италия ҳам, Швеция, ёки Хорватия ҳам бўлиши мумкин.  

УКРАИНА – ХОРВАТИЯ (9 октябрь, 23:45)

Турклар ўз майдонларида исландларга имкониятни бой бериб, курашдан чиқди ва гуруҳдаги чигал вазият ечилди. Ечилгани шундаки, Исландия терма жамоаси ўз майдонида гуруҳ аутсайдери Косовони енгса тамом, гуруҳ ғолибига айланади.

2-ўрин масаласи эса, Украина ва Хорватия ўртасидаги ўзаро тўқнашувда аниқланади. Ҳозирда ҳар икки жамоа ҳам тенг очко тўплаган. Иккинчи ўринни олиб плей-оффда қатнашиш учун ҳам икки жамоага фақат ғалаба керак бўлади.  

ЭКВАДОР – АРГЕНТИНА (11 октябрь, 04:30)

Аргентина гуруҳда 6-ўринга тушиб қолган бўлса-да, мундиал йўлланмаси ҳамон ўз қўлида қолмоқда. Месси ва унинг шериклари Эквадорда ғалаба қозонишса, ўзаро тўқнаш келадиган Перу ва Колумбиядан камида биттасини ортда қолдириб, камида 5-ўринга кўтарилиши ва ҳеч бўлмаса, плей-офф орқали ЖЧ га бориш имкониятига эга бўлади. 

Лекин осон бўлармикин? Эквадор майдонида Уругвай ва Чили каби терма жамоалар ҳам бир очко олишнинг уддасидан чиқа олишмаган. Шунингдек, бу жамоаларнинг Аргентинадаги ўйинида эквадорликлар 2:0 ҳисобида ғалаба қозонишган. Энди бу фактларга Аргентинанинг муаммоларини қўшинг — жамоа 2017 йилда атиги 2 марта рақиб дарвозасига гол урди — бири пенальтидан, иккинчиси автогол. Аргентина сафар ўйинларида охирги марта 2016 йилнинг март ойида ғалабага эришганди, шундан буён меҳмондаги 6 ўйинда жамоа ғалаба қозона олмаяпти. 

ПЕРУ – КОЛУМБИЯ (11 октябрь, 04:30)

2017 йилни Перу ажойиб шаклда ўтказди, Уругвай, Эквадор каби терма жамоалар устидан ғалабага эришилди, Аргентинада дуранг ўйналди. Мукофоти мана — перуликлар ўз майдонларида Колумбия устидан ғалаба қозонишса, энг камида 5-ўрин нақд бўлади. Ҳатто тўғридан тўғри йўлланма учун ҳам яхшигина имконият бор. 

Колумбия терма жамоаси жудаям қийналиб кетса, дурангга рози бўлиши мумкин. Бу ҳолатда колумбияликлар фақат Аргентинани олдинга ўтказиб юбориб, 5-ўринга тушиб қолишлари мумкин холос. Сўнгги турда Парагвай ҳам Колумбияни  қувиб ўтиши учун 7 тўп фарқи билан ғалаба қозониш керак-ки, бунга ишониш қийин. 

Ҳамма ҳам жаҳон чемпионатига тўғридан-тўғри боргиси келади, демак, бизни ҳар икки рақибни ҳам фақат ғалаба қониқтирадиган ажойиб кураш кутиб турибди.  

УЭЛЬС – ИРЛАНДИЯ (9 октябрь, 23:45)

Худди Украинадаги вазиятга ўхшаш, аммо янаям қизиқроқ бўлиши мумкин. Бу ерда майдон эгаларини дуранг ҳам қониқтиради. Аммо бу ер британ дербиси, бу ерда майдон эгалари деган ибора ҳам ортиқча бўлса керак. 

Сербларнинг сўнгги турда Грузияни қабул қилишларини эътиборга олсак, бу жамоалар кўпроқ иккинчи ўрин масаласини ҳал қилиш ҳақида ўйлаётган бўлишлари табиий. Бу жамоаларнинг март ойидаги ўйинида ҳисоб очилмаганди.

АВСТРАЛИЯ – СУРИЯ (10 октябрь, 14:00)

Қанийди, Сурия терма жамоаси мундиалга чиқса-ю, биз футбол мутасаддиларимизнинг жаҳон чемпионатига бориш осон эмас, бу учун у керак, бу керак деган бахоналаридан қутулсак. Ахир Сурия ҳали ҳам чемпионатга бориш учун имкониятга эга бўлиб турибди, дастлабки учрашув Австралия билан ҳам тенг ўйнаш мумкин эканини ўзлари учун ҳам исботлашди, масалан.

Сурия қайсидир маънода ўтган саралашдаги Иорданияни ёдга солмоқда. Иорданияликлар ўшанда ўз майдонларида Ўзбекистон билан худди шундай 1:1 ўйнаб, жавоб ўйинида керакли натижага эришгандилар. Фарқи, бу сафар Россияга бориш учун реалроқ имконият бор, чунки кейинги плей-оффда рақиб Уругвай эмас, Шимолий Америка вакили бўлади. Улар билан ўйнаса бўлади. Ҳамма билан ўйнаса бўлади. Буни Сурия исботлашда давом этмоқда.

АФРИКАДА НИМА ГАПЛАР?

Африка минтақаси учун 5 ўрин берилган ва у ердаги саралашнинг финал босқичи 5 гуруҳда бўлиб ўтмоқда. Демак, Африка жамоалари плей-оффда ўйнашмайди — улар учун октябрдаги ўйинлар ўз ниҳоясига етди. Ноябрда бўладиган сўнгги тур олдидан, Нигерия ва Миср терма жамоаси мундиал йўлланмасини нақд қилди. Тунис терма жамоасида ҳам яхши имкониятга эга. Фақат икки гуруҳда вазият ҳал бўлгани йўқ ва эътиборингизни айнан шу ўйинларга қаратамиз:

КОТ Д'ИВУАР – МАРОКАШ (6 ноябрь)

Кот Д'ивуарнинг кутилмаган дурангидан сўнг, Африка минтақаси В гуруҳида ҳам жуда қизиқ вазият юзага келди. Марокашликлар ғалаба қозониб, гуруҳ пешқадамига айланиб олишди. Россияга бориш учун энди, мезбонлар Марокашни енгишлари керак бўлади.

Марокаш терма жамоасининг бу гуруҳ босқичида ҳали бирор марта мағлубиятга учраш тугул, гол ҳам ўтказиб юбормаганини эътиборга олсак, бу осон бўлмаслиги аниқ. Марокаш ўтган 5 учрашувнинг 3 тасида 0:0 ҳисобида дуранг ўйнаган — бу ҳисоб бу сафар ҳам уларни жуда қониқтиради. 

СЕНЕГАЛ – ЖАР (6-10 ноябрь)
Ҳозирда бу жамоалар гуруҳда биринчи ва сўнгги поғоналарни эгаллаб турган бўлишса-да, мундиал йўлланмаси учун тўғридан тўғри рақибга айланишган. Сабаби, бу жамоалар икки марта ўзаро ўйин ўтказадилар. Сенегал 8 очко билан гуруҳ пешқадами, ЖАР да эса, 4 очко бор. Демак жанубликлар мана шу икки ўйинда ғалаба қозона олишса, очколари сонини 10 тага етказиб гуруҳ ғолиби бўлиб оладилар.

Демак Сенегал бу ўйинлардан бирида ғалаба қозониш ёки икки ўйинда ҳам дуранг ўйнаш орқали финал босқичидан жойни кафолатлаши мумкин.

Қаҳрамон Асланов тайёрлади.