Славолюб Муслин шогирдлари 9-турда Венада ютқазганди, аммо улар Белградда ғалаба қозонса, 2018 йилги жаҳон чемпионати йўлланмасини нишонлаш учун имкониятлар сақланиб қолганди. Аммо Сербияга осон бўлмади, грузинлар болқонларнинг ҳаётини оғирлаштириш учун қўлларидан келганча ҳаракат қилишди. 70-дақиқада Канкава гол уришга жуда яқин ҳам келганди. Аммо голни 74-дақиқада мезбонлар вакили Прийович урди. Серблар жаҳон чемпионатининг навбатдаги иштирокчиси.
Кардиффда параллел кечган британ дербисида Уэльс ва Ирландия ҳам тўғридан-тўғри имконият учун кураш олиб борганди. Прийовичнинг голига қадар Ирландия бу йўлланма учун асосий даъвогар бўлиб турганди. Ирландлар сафарда Уэльсни буткул штурм ҳолатида ушлаб туришди. Крис Коулманнинг 9 учрашувдан иборат мағлубиятсиз серияси аянчли ҳолатда якунига етди. Иккинчи бўлим бошида Хендрик ва Макклин тандеми учрашувдаги ягона голни юзага келтиришди. «Яшил кийимдаги йигитлар» гуруҳ босқичида сафардаги ўйинларни мағлубиятсиз ўтказишди(3та ғалаба ва 2 дуранг).
Бу гуруҳда Сербия 21 очко билан биринчи ўринни эгаллади, Ирландия 19 очко олиб плей-оффда қатнашадиган бўлди, Гарет Бэйл жамоадошлари бортдан ташқарида қолди (17 очко).
Кейинги ёзда Россияда исландиялик викингларни ҳам кўрамиз. Жаҳон чемпионати тарихида илк марта аҳолиси миллион кишидан кам давлат терма жамоаси иштирок этадиган бўлди (бу орол давлат аҳолиси 334 минг киши). Исландия терма жамоаси 2016 йилги Европа чемпионатидаги жасорат шунчаки тасодиф эмаслигини исботлай олишди ва Туркия, Хорватия ҳамда Украина каби кучли жамоалар билан битта гуруҳда биринчи ўринни эгаллади.
Исландияликлар етакчиси Гильфи Сигурдссон Косовога қарши ўйинда барчасини ҳал қилди. У аввалига ўз маҳоратини намойиш этиб ҳисобни очди, иккинчи голда Гудмундссонни ажойиб пас билан таъминлаб, иккинчи гол урилишига замин яратди.
Туркия Финляндияни ҳам енга олмади. Бу Мирча Луческунинг терма жамоа бошқарувидаги охирги ўйини бўлиши мумкин. Турклар саралаш босқичини ўта муваффақиятсиз ўтказишди. Охирги тур ўйинида Женк Тўсун урган голлар ғалаба учун етарли бўлмади. Туркия 10 ўйинда атиги 15 очко жамғарди ва тўртинчи бўлди.
Бу кечанинг асосий интригаси Хорватия ва Украина ўйинида эди. Бу икки терма жамоа фақат ғалаба учун майдонга тушганди. Аммо Киевда, ўз майдонида ҳаракат қилган украиналиклар ожиз қолишди.
Андрей Шевченко шогирдлари биринчи бўлимни тетик ўтказишди. Кўплаб голли вазиятлар яратилди. Аммо танаффусдан кейин савиядаги фарқлар билиниб қолди. Андрей Крамарич 8 дақиқа ичида дубль қайд этди ва ўйин тақдирини ҳал қилди. Украина бортдан ташқарида, хорватлар плей-оффда қатнашади.
Қайд этиш керакки, Украина жаҳон чемпионати йўлланмасидан мосуво бўлиши спорт оламини эҳтимолий можародан қутқарди. Украина ва Россия ўртасидаги сиёсий зиддиятлардан келиб чиққан ҳолда, агар украинлар Россияда ўтадиган жаҳон чемпионатига борса, бу муаммоларга сабаб бўлиши кутилаётганди.
«Енгилмас армада» ва Италия юбилейи
G гуруҳи Исроил – Испания – 0:1. Гол: Илльяраменди, 76. Албания – Италия – 0:1. Гол: Кандрева, 73. Македония – Лихтенштейн – 4:0. Голлар: Муслиу, 36. Трайковски, 38. Барди, 67. Адеми, 69.
Бу гуруҳда охирги турдан олдин ҳеч қандай интрига қолмаганди, гуруҳда биринчи ва иккинчи ўрин эгалари маълум бўлган, Испания биринчи ўрин билан мундиалда тўғридан-тўғри иштирок этиши, Италия йўлланма учун плей-оффдаги рақибни енгиши кераклиги аниқ бўлганди. Ва душанба кунги ўйинларда ҳеч қандай сюрприз кузатилмади.
Италия Кристиан Пануччи бошқарувидаги албанларни кичик ҳисобда енгди. Бу ўйин «Скуадра адзурра» учун 800-ўйин бўлди. Вентура бошқарувидаги жамоанинг юбилей учрашувида Кандрева ғалаба голига муаллиф бўлди, унинг ўзи учун бу учрашув терма жамоадаги 50-учрашув эди.
Испания Муқаддас ерда Исроилни кичик ҳисобда енгди. «Қизил фурия» таркибида Бускетс 100-ўйинни ўтказди. У бу натижага эришган ўн иккинчи испаниялик футболчига айланди.
Ўйиндаги ягона гол Ильярраменди номига ёзилди. Хулен Лопетеги Луис Арагонеснинг рекордини такрорлади, у ҳам терма жамоадаги фаолиятини мағлубиятсиз серия билан ўтказмоқда - 14 ўйин. Испанларнинг ҳозирги мураббийи мэтрдан ўзиб ҳам кетди: Арагонес 8 ғалаба ва 6 дуранг қайд этганди, Лопетегида эса 14 учрашувда 11 ғалаба, 3 дуранг.
Македония ва Лихтенштейн учрашувида эътиборга арзигулик ягона жиҳат бу учрашув шу оқшомда энг кўп гол урилган учрашув бўлди - 4:0.
