Ўзбекистонда автомобилларда маълум турдаги газ баллонларидан фойдаланиш тақиқланади

Ўзбекистонда 2018 йил 1 февралдан бошлаб СТГ-2, СТГ-3 ва СТГ-4 туридаги газ баллонли ускуналар ўрнатилган автомобиллардан фойдаланиш тақиқланади. Бу Вазирлар Маҳкамасининг 11 октябрдаги қарорида белгилаб қўйилган.

Шунингдек, завод ускуналари бузилган СТГ-1 баллонли транспорт воситаларни бошқариш тақиқланади. Янги қоидаларда Самарқанднинг JV MAN Auto-Uzbekistan заводида ишлаб чиқарилувчи, СТГ-3 газ баллонларидан фойдаланувчи MAN А 22 CNG автобуслари ягона истиснога айланади.

Кейинги йилнинг 1 февралидан сўнг, агарда инспекторлар йўлларда СТГ-2, СТГ-3 ва СТГ-4 газ баллон ускуналари, шунингдек, завод ускуналари бузилган СТГ-1 баллонларига эга автомобилларни аниқласалар, уларнинг эгаларига фойдаланилиши тақиқланган транспорт воситаларини бошқарганлиги учун жавобгарлик қўлланилади.

Амалдаги қонунчиликка кўра, фойдаланилиши тақиқланган транспорт воситаларини бошқариш ЭКИҲнинг 5 баробари миқдоридаги жарима солинишига сабаб бўлади (748 875 сўм).