Анонс. Европада дам олиш кунларидаги 6 учрашув

Еврокубоклар тугар-тугамас, бугундан Европа майдонларида миллий чемпионат ўйинлари бошланади ва албатта, улар ичида эътиборга арзирли марказий учрашувлар жуда кўп. Анъанамизга содиқ қолган ҳолда, ана шу ўйинлар ҳақида қисқача тўхталамиз. 

НАПОЛИ - ИНТЕР (21 октябрь, 23:45)

Ўтган ҳафтада марказий ўйинларда кучли рақиблар устидан ажойиб ғалабага эришган икки жамоа бу сафар ўзаро орани очиқ қилади. Бир неча қийин ўйинларда ғалаба қозониб, «Интер» ҳам ниҳоят юқори ўринлар учун даъвогар бўла олишини исботлади. «Наполи» эса, ҳатто мағлубият билан тугаган Манчестер сафаридан сўнг ҳам, ёмон фикр уйғотмади. Сарри шогирдлари рақиб ким бўлишидан қатъи назар ўз услубларидан воз кечмасликларини исботладилар. 

«Интер» «Наполи»дан атиги 2 очко кам тўплаган холос, демак ғалаба миланликларни жадвалда пешқадамга айлантиради. «Наполи» эса Европадаги кучли чемпионатлар ичида йўқотишсиз бораётган охирги жамоа сифатида навбатдаги ғалабага интилиши табиий. Ҳатто Чемпионлар Лигаси олдидан клуб президенти асосий эътибор Италия чемпионатига қаратилиши, Манчестердаги ўйиндан кўра «Интер»га қарши ўйин муҳимроқ эканини айтганди. 

А Серияда доирасидаги ўйинларда, 2011 йилдан бери, «Наполи» «Интер»ни ўз майдонида ютиб келмоқда.  

ВАЛЕНСИЯ - СЕВИЛЬЯ (21 октябрь, 21:30)

Ушбу мавсумда «Валенсия» нафақат мағлубиятсиз серия билан турнир жадвалида «Барселона»ни таъқиб қилмоқда, балки, жуда ҳужумкор ва қувноқ ўйин намойиш қиляпти ҳам. Жамоа 8 турда 21 гол уришнинг уддасидан чиқди, италиялик ҳужумчи Симоне Заза эса, Ла Лигада ўтган ойнинг энг яхши ўйинчиси деб эътироф этилди. 

«Севилья» ҳам рақибидан у қадар узоқда бўлмаса-да, ўйин борасида муаммолар жуда кўп. Масалан, 8 ўйинда атиги 9 гол урилган, ҳозирча фақат аутсайдер жамоалар мағлуб этилмоқда. Ва албатта, Чемпионлар Лигасида «Спартак»дан қабул қилинган йирик мағлубият ҳам «Севилья»нинг бугунги ҳолатини ифодалаб турибди. 

Аммо барибир, ўйин юқори ўринлар учун даъвогар бўлган рақиблар ўртасида эканини, жамоалар таркиб жиҳатидан бир-бирига жуда мослигини эътиборга оламиз. Қизиқ бўлиши табиий.

ЭВЕРТОН - АРСЕНАЛ (22 октябрь, 17:30)

Трансфер бозоридаги сарфлар бўйича ҳатто АПЛда етакчилардан бири бўлган «Эвертон»нинг аҳволи яхши эмас. Аввалига тақвимнинг ноқулайлиги ҳақида айтилди, аммо кейинги ўйинларда ҳам, масалан, «Бёрнли»дан ўз майдонидаги мағлубият, «Брайтон»даги дуранг кўрсатяптики, ҳали ҳам жамоа ўйнаб кетгани йўқ. Кўп футболчилар сотиб олингани билан, Лукакунинг катта пулга сотиб юборилганини ҳам эътиборга олиш керак. Аслини олганда, кўп футболчилар олингани ҳам мураббийга вақт кераклигини кўрсатади. Балки шунинг учун ҳали ҳам Роналд Куманга имкон беришаётгандир. 

Имкон ҳақида гапирсак, Арсен Венгерда бу борада муаммо йўқ. Венгер қолади, Венгер кетади чархпалаги бир маромда айланаётганига йиллар бўлди. «Арсенал» ўз майдонидаги бир қатор ғалабалардан сўнг, пешқадамларга яқинлашиб олганди, аммо «Уотфорд»да кутилмаган муваффақиятсизлик вазиятни оғирлаштирди. Жамоанинг сафардаги 4 учрашувнинг 3тасида мағлуб бўлгани энди бот-бот тилга олинмоқда. 

Ҳар икки жамоа учун ҳам ғалаба зарур, умуман «Эвертон» ва «Арсенал» баҳси доимо қизиқ бўлиб келган. Лекин бошқа тарафдан, ҳар икки жамоа ҳам кеча, бу ўйиндан икки кун олдин Европа Лигасида майдонга тушишган. Бу мураббийлар учун бошоғриқ, лекин биз учун эмас, чунки бундай ҳолатларда хатоларга ва голларга бой ўйиннинг гувоҳи бўлишимиз эҳтимоли йўқ эмас.

ТОТТЕНҲЭМ - ЛИВЕРПУЛЬ (22 октябрь, 20:00) 

«Тоттенҳэм» Чемпионлар Лигасида «Ливерпуль»дан бир кун олдин майдонга тушди. Аммо Почеттино шогирдларининг рақиби «Марибор» эмас, «Реал», демак бу томондан имкониятни тенг баҳолаш мумкин.

Умуман, сафардаги ўйинларда, ҳатто Мадридда ҳам бўш келмаётган «Тоттенҳэм»нинг уй ўйинлари унчалик ишончли чиқмаяпти. «Уэмбли»да мавсумдаги илк ғалабани ҳам «Тоттенҳэм» ўтган ҳафтада «Борнмут» устидан минимал ҳисобда қозонди. «Ливерпуль»га эса, уй-сафар фарқи йўқ, рақиб агар топ-клуб бўлса айни муддао. Зеро, Клопп қўл остида «Ливерпуль» топ-6 га қарши 20 ўйинда майдонга тушган бўлса, атиги 2 марта мағлубиятга учраган холос. Ва бу «Тоттенҳэм» эмасди. 

Айтганча, Юрген Клоппнинг Англиядаги илк ўйини айнан «Тоттенҳэм»га қарши «Уайт Ҳарт Лейн»да бўлиб ўтганини алоҳида таъкидлаш жоиз. Ўша ўйинда ҳисоб очилмаганди. 

ГАЛАТАСАРОЙ - ФАНЕРБАҲЧЕ (22 октябрь, 21:30)

Сўнги йилларда Туркияда «Бешиктош» лидер бўлиб олган ва буни Европада ҳам кўрсатаётган бўлса-да, турк футболининг энг катта ўйини айнан мана шу жамоалар ўртасида кечади. Истанбул иккига бўлинади, деб ҳам айтиш мумкин. 

«Галатасарой» Европада урф бўлиб қолган (7 ғалаба-1 дуранг-0 мағлубият) кўрсаткич билан Суперлигада биринчи ўринда бормоқда, «Фенербахче» эса, фақат сўнгги ўйинларда ўзига келди ва етакчи гуруҳга яқинлашиб бормоқда. Бу гаплар ҳам ортиқча, хуллас, жуда кескин ва муросасиз ўйин бўлишига йиллар кафолат беради. 

МАРСЕЛЬ - ПСЖ (22 октябрь, 24:00)

Бу эса Франциянинг энг номдор жуфтлиги. Бугуннинг урфи «ПСЖ» бўлиши мумкин, аммо бу йўллардан Марсель ўша 90-йилларда ўтиб бўлган. Бернар Тапи ва Франц Баккенбауэрнинг «Олимпик»ини эсларсиз. Хуллас, Чемпионлар Лигасида ғолиб чиққан ягона француз жамоаси мана шу соврин учун ҳаракат қилаётган иккинчи жамоани ўз майдонида қабул қилади. 

2011 йилда марселликлар ўз майдонида «ПСЖ» устидан 3:0 ҳисобида устун келганди. Кейинги мавсумда дуранг қайд этилди, шундай буён, кейинги йилларда меҳмонларнинг қўли баланд келмоқда. Бу анъанани бузиш осон бўлмаслиги аниқ. Бунинг устига «Марсель» Европа Лигасида тўп сурмоқда, яъни рақибидан бир кун кам тикланиш вақтига эга бўлади. 

БОНУС
Бу ҳафта «Барселона» ўз майдонида (21 октябрь, 23:45) «Малага»ни қабул қилади. «Реал» эса, эртасига худди шу вақтда «Эйбар»га қарши Мадридда тўп суради. 

Эътибор берган бўлсангиз, бу ҳафта катта афишага эга бўлган учрашувлар у қадар кўп эмас. Аммо тажриба шуни кўрсатадики, аслида, олдиндан у қадар қизиқ туюлмаган жуда кўп ўйинлар жуда голларга бой ва қизиқарли сценарий ҳосил қилади. Шу туфайли сизга, ўйин танламасдан, имкон қадар кўпроқ ўйинларни кўраверишни маслаҳат берамиз.