Қирғизистон бош вазири Жумақодировнинг ўлимидан кейин бўш қолган ўринга номзод тавсия этди 

Қирғизистон бош вазири Сапар Исоқов Талас вилояти губернатори Даир Кенекеевни бош вазирнинг куч блокига жавоб берувчи ўринбосари лавозимига номзод қилиб кўрсатди, дея хабар берди РИА Новости республика ҳукумати девонидаги манбага асосан.

Қирғизистон ҳукумати бошлиғининг ўринбосари лавозими октябрь ойи бошида 38 ёшли бош вазир ўринбосари Темир Жумақодиров ҳалок бўлганидан сўнг бўш турганди. Жумақодиров, унинг ҳайдовчиси ва ёрдамчиси бўлган Toyota Land Cruiser йўлтанламаси «КАМАЗ» билан тўқнашиб кетган. Йўлтанламасда бўлганларнинг барчаси воқеа жойида ҳаётдан кўз юмдилар.

"Бош вазир Даир Кенекеев номзодини бош вазир ўринбосари лавозимига тавсия этди", - дея хабар берган агентлик суҳбатдоши.

44 ёшли Кенекеев Новосибирск аграр коллежи, Қирғизистон дипломатия ҳамда халқаро ҳуқуқ Халқаро университети Олий мактабини тамомлаган. Айни дамда у республика Талас вилояти ҳукуматининг (губернатор) ваколатли вакили ҳисобланади.

Қирғизистон қонунчилигига кўра, ҳукумат парламентни бош вазир тақдимномасига кўра шакллантиради.