18 кишилик товламачи гуруҳ қўлга олинди

Сурхондарё вилоятининг Жарқўрғон туманида товламачилик билан шуғулланган жиноий гуруҳ фаолияти фош этилди. Гуруҳ аъзолари ўртасида “маҳалла раиси”, “посбон”, “терговчи”, “тасвирчи”, “ҳайдовчи” ва бошқа вазифалар бўлиб олинган. Ҳар бир гуруҳ аъзоси ўз вазифасини пухталик билан ишонарли қилиб бажарган, деб хабар бермоқда Сурхондарё вилояти ИИБ матбуот хизмати.

Уларнинг асосий фаолиятлари бегона эркак мижозларни ўз хоҳишлари ва алдов билан гуруҳга тегишли қизлар ёрдамида ўз яшаш хонадонларига “массаж”, “дам олиш”, “маишат” қилиш баҳоналари билан чақириш, улар билан бир дастурхонда еб ичиб, ташриф буюрган эркакларни алоҳида хонада ҳозирланган тўшакка олиб кириш, мижоз ечиниши билан жиноий гуруҳ аъзолари кириб келиб, уяли телефон воситаси ёрдамида тасвирга олишдан иборат бўлган. Гуруҳ аъзолари мижозларни маҳалласига, оиласига, иш жойига шарманда қилиш, олинган тасвирларни интернетга чиқариб юбориш, профилактика инспекторига арз қилиш билан қўрқитиб, катта миқдордаги пулларни товламачилик йўли билан олишган. Жиноий гуруҳ аъзолари операция режадагидай ўтгани учун навбатдаги “ўлжа”ни қўлга туширишмоқчи бўлишади. Бироқ бу гал “ўлжа” ўрнида жиноий гуруҳ аъзолари бўлиб, навбатдаги операцияни ўтказиш вақтида жиноят устида ҳуқуқ-тартибот идоралари ходимлари томонидан қўлга олиндилар. 

Ушбу жиноий гуруҳларни К.Г. ҳамда К.Ф.лар бошқаришганлиги, шунингдек вояга етмаган фарзандини ҳам жиноят содир қилишга жалб қилишганлиги аниқланиб, жиноий гуруҳнинг барча аъзоларига нисбатан Ўзбекистон Республикаси Жиноят кодексининг тегишли моддалари билан жиноий иш қўзғатилган. Ҳозирда мазкур жиноий гуруҳнинг бошқа жиноятларга алоқадорлиги бўйича тергов ва суриштирув ишлари олиб борилмоқда.