Грандлар учун омадсиз ҳафта. «Реал», «Барса» ва «Валенсия»да йўқотиш

«Трибуна» Испания чемпионатининг 14-тури якунларини сарҳисоб қилади. Ушбу тур турнир жадвали етакчилари учун омадсиз келди, аввалига «Барселона», кўп ўтмай «Реал» очко йўқотди, кейинги куни эса «Валенсия» мавсумдаги илк мағлубиятни қабул қилиб олди. Кучли тўртликдан фақат «Атлетико» ғалабага эришди.

«Сельта» билан дуранг ва Умтитининг 2 ойга йўқотилиши

БАРСЕЛОНА – СЕЛЬТА 2:2
Голлар: 0:1 – 20 Аспас, 1:1 – 22 Месси, 2:1 – 62 Суарес, 2:2 – 70 Макси Гомес.
Барселона – тер Стеген, Серджи Роберто, Пике, Умтити (Вермален, 72), Альба, Бускетс, Ракитич (Пако Алькасер, 79), Иньеста (Денис Суарес, 53), Паулиньо, Месси, Суарес.
Сельта – Бланко, Васс, Гомес (Кабраль, 4), Фонтас, Мальо, Браис Мендес (Ронкалья, 63), Лоботка, Хосабед (Эрнандес, 84), Систо, Аспас, Макси Гомес.
Огоҳлантиришлар: Суарес (1), Ронкалья (74), Хосабед (81), Вермален (83), Бланко (86), Васс (87), Систо (88), Мальо (90), Пике (90).

Мураббий вазифаси

«Барселона»да Луис Энрикега ёрдамчилик қилган Хуан Карлос Унсуэ у кетгач, жамоа бош мураббийлиги учун асосий номзод бўлганди. Аммо Неймар билан низо туфайли унинг каталонлар жамоаси мураббийлиги бўйича истиқболига тўсиқ бўлди. «Барселона» раҳбарияти таваккал қилишни истамади ва Эрнесто Вальверде номзодида тўхталди. Якунда «Камп Ноу» ҳам Неймарсиз, ҳам Унсуэсиз қолди, биринчиси Парижга йўл олди, иккинчиси «Сельта»ни бошқара бошлади. Вигода унинг ишлари юришди, дейиш қийин, аммо жамоа ўртамиёналар қаторида муқим ўрин эгаллаган. Шанба кунги «Барселона»га қарши ўйин унинг Каталония пойтахтидаги стадионга илк қайтиши бўлди. У жамоасининг омадсиз сериясини якунлаши талаб этиларди, «Камп Ноу»даги охирги ўйинларда «Сельта» 1:6 ва 0:5 ҳисобларида ютқазганди.

Вальвердедан алоҳида иш талаб этилмасди, у Испаниядаги мураббийлик фаолияти давомида «Сельта»га қарши 13 учрашув ўтказган ва бирон марта ютқазмаган (10 ғалаба ва 3 дуранг). Кўк-анорранглилар жамоаси бош мураббийи «Валенсия»га қарши ўйиндаги омадсизликдан кейин (Мессининг голи ҳисобга олинмагани туфайли очко йўқотилганди - 1:1) футболчиларни ғалабага тайёрлаш талаб этиларди. Бу тур арафасида «Валенсия» билан орадаги фарқ 4 очко, «Атлетико» ва «Реал» билан фарқ 8 очкони ташкил этаётганди.

Йўқотишсиз бир йил

Бир йилдан буён «Барса» «Камп Ноу»да очко йўқотмай келаётганди. Охирги марта 2016 йилнинг 3 декабрида Серхио Рамос охирги дақиқада гол уриб, «Реал»ни мағлубиятдан сақлаб қолганди (1:1). Шундан кейин уй учрашувларида «Барса» 18 ғалаба қайд этди. Лекин «Сельта» «Барселона» учун ноқулай рақиблардан ҳисобланади, бу жамоа охирги 4 мавсумда каталонияликлардан 9 очко олган. Бу борада энг яхши кўрсаткич «Малага»да (10 очко), кейинги ўринларда «Реал» (8) ва «Атлетико» (7).

Ўйин бошидаги мудроқлик

«Барселона» ўйинни ҳужумкор бошлай олмади. Дастлабки 20 дақиқа давомида бу жамоа футболчилари уйқусираётгандек ҳаракат қилишди. Фақат Лео Месси ҳаракат қиларди, у «Месталья»да ҳисобга олинмаган ҳақиқий голини қайтариш учун ҳам тинмасди. Қолаверса, бу ўйинда ҳам гол ура олмаса, унинг голсиз серияси 2 ойга чўзилган бўларди, у 6 ўйиндан буён (терма жамоа ва бошқа турнирлар қўшиб ҳисобланганда) рақиблар дарвозаларига йўл топа олмай келаётганди. Месси охирги марта 28 октябрь куни «Атлетик» дарвозасини ишғол этганди.

Шу туфайли илк дақиқалардан олдинга интилган Месси 5-дақиқада яхши имкониятга эга бўлди, у 50-60 метр масофани бир ўзи босиб ўтиб, ҳимоячиларни доғда қолдирди, аммо охирги ҳимоячи унинг зарбасини тўсиб қолди.

Бу орада «Сельта» ўз имкониятидан фойдаланди. Ҳимоядаги муаммолар «Барселона»га панд берди, қанот ҳимоячилари ҳужумга ўтиб кетганида меҳмонлар қарши ҳужум уюштиришди ва Васс Аспасни тўп билан таъминлади, Аспас ўзидан ҳам қулайроқ вазиятда бўлган Макси Лопесга тўп оширди, унинг зарбасини тер Штеген қайтарди, аммо тўпга биринчи бўлиб келган Аспас дарвозани ишғол қилди.

Ўтказилган голдан кейин ўзига келган «Барселона» ҳужумга ўтди ва икки дақиқадан кейин тўп Мессининг зарбасидан кейин Рубен Бланко оёқлари орасидан ўтди. Кўк-анорранглилар босимни оширишда давом этди, агар Бланконинг сэйвлари бўлмаганда ҳисоб танаффусга қадар йирик кўринишга келиши мумкин эди. Кўп қулай вазиятларни одатдагидек Суарес йўққа чиқарди.

Умтити Класикодан ташқарида

Иккинчи бўлим биринчи бўлимнинг иккинчиси каби бошланди. Мезбонлар тинимсиз ҳужум уюштирар, Бланко гоҳ у бурчакка, гоҳ бу бурчакка отилиб, жамоасини қутқаришда давом этарди. Аммо у ҳам бир сафар ожиз қолди, Альба Суаресни дарвозабон билан яккама-якка вазиятга чиқарди, уругвайлик ҳужумчи бу сафар ўз имкониятидан фойдаланди. Аммо қувонч кўпга чўзилмади, 70-дақиқада майдон эгалари бирданига иккита муаммога дуч келишди. Аспас яна Умтитидан қочиб кетди ва ва Гомесни қулай вазиятга чиқарди, тўпни ўзига ўнглаб олиш учун етарлича вақтга эга бўлган ёш уругвайлик ҳужумчи бу сафар аниқ ҳаракат қилди - 2:2.

Аммо кўк-анорранглилар учун бу охиргисимасди. Голли вазиятда Аспасни таъқиб қилган Умтити белини жароҳатлаб олди ва ўйинни давом эттира олмайдиган бўлди. Ўйиндан кейин ушбу франциялик футболчининг ҳолати ҳақида расман маълум қилинди, у икки ойга сафдан чиққан ва 23 декабрь куни «Реал»га қарши класикода майдонга туша олмайди. Умтитининг сафдан чиқиши, Маскеранонинг жароҳати каталонияликларни йил ўйинидан олдин қийин аҳволда қолдирди.

Ўйиннинг қолган вақтида «Барса» гол ура олмади ва таблодаги ҳисоб ҳам ўзгармади. Каталонияликлар қаторасига иккинчи турда очко йўқотишмоқда. Вальверда «Сельта»га ютқазмаслик анъанасини давом эттирди, аммо «Барса» бу ўйинда бир йилдан бери илк марта ўз майдонида ғалаба қозона олмасдан, икки очко йўқотди. Энди «Сельта» охирги 4 мавсумда «Барселона»дан очко тортиб олиш бўйича энг яхши кўрсаткичга (11 очко) эга жамоага айланди. Қолаверса, бу вақт ичида Виго жамоаси «Барселона» дарвозасини 12 марта ишғол қилган ва бу ҳар қандай испан жамоасининг натижасидан устунроқдир.

Шанба кунгига ўхшаш муваффақиятсиз ўйинлар бўлган йилларда каталонияликлар «олтин»ни қўлдан бой беришган. Жамоа ҳозирча очко йўқотмасдан давом этмоқда, аммо бундай йўқотиш жамоанинг руҳий ҳолатига таъсир кўрсатиши мумкин. Вальверде ва компания ҳушёр тортиши керак бўлади.

«РЕАЛ» «БАРСА»НИНГ ЙЎҚОТИШИДАН ФОЙДАЛАНА ОЛМАДИ

АТЛЕТИК - РЕАЛ - 0:0
Атлетик: Аррисабалага, Де Маркос (Лекуэ, 72), Эчейта, Нуньес, Баленсиага, Иньяки Уильямс (Кордоба, 83), Микель Рико, Итурраспе (Сан-Хосе, 39), Рауль Гарсия, Сусаэта, Адурис.
Реал: Навас, Карвахаль, Варан, Серхио Рамос, Марселу, Модрич, Каземиру, Кроос, Иско (Ковачич, 82), Бензема (Майораль, 82), Криштиану Роналду.
Огоҳлантиришлар: Серхио Рамос, 11. Де Маркос, 45. Эчейта, 57. Карвахаль, 73. Карвахаль, 90+1. Криштиану Роналду, 90+3.
Четлатиш: Серхио Рамос, 86

«Реал» мухлислари 222 кундан буён илк марта клуб триосини, Роналду, Бэнзема ва Бэйлни бирга кўришдан умид қилишганди. Бу футболчилар апрель ойидан буён бирга ўйнамаётган, гоҳ бири дисквалификацияга учрар, гоҳ жароҳат олар ёки мураббийнинг ротациялари рўй берарди. Аммо примерада бу учликни яна бирга кўриш ортга сурилди. Сешанба куни Испания Кубоги доирасида «Фуэнлабрада»га қарши ўйинда захирадан майдонга тушган Бэйл чўлоқланиб майдондан чиқиб кетишга мажбур бўлди. Унинг таркибга қачон қўшилиши номаълум, «Реал» эса у сиз «Сан Мамес»да очко йўқотди (0:0).

«Реал»нинг «Атлетик»ка қарши ўйинидан кейин йўқотишлар янада кўпайди, Карвахаль ва Каземиро сариқ карточкалари ортиб кетгани туфайли кейинги турда «Севилья»га қарши ўйинда қатнашмайди. Ўйиндаги яна бир йўқотиш Серхио Рамоснинг қизил карточка олиб майдонни тарк этиши бўлди. Бу унинг фаолиятида Испания чемпионатида 19-марта четлатилиш бўлди. Ла Лигада у каби кўп қизил карточкани ҳеч ким олмаган.

«ВАЛЕНСИЯ»НИНГ ҚОҚИЛИШИ

ХЕТАФЕ – ВАЛЕНСИЯ 1:0 (0:0, 1:0)
Гол: 1:0 – 66 Бергара.
Огоҳлантиришлар: Молинеро (13), Арамбарри (21), Кондогбиа (23), Даконам (52), Парехо (69), Дьедиу (71), Анхель (73), Монтойя (83), Молина (88), Суарес (90), Санти Мина (90).
Четлатиш: Арамбарри (25).

Испания чемпионати учлигидаги мавсумни мағлубиятсиз ўтказаётган 3 жамоа қолганди– «Барса», «Атлетико», «Валенсия», – «кўршапалаклар» таслим бўлди. Марселино шогирдлари ҳам «Реал» каби «Барселона»нинг қоқилишидан фойдалана олмади – орадаги фарқ қисқариш ўрнига ошди, агар «Хетафе»га қарши ўйинда валенсияликлар каталонлар билан орадаги фарқни 2тага қисқартириши мумкин эди, аммо кутилмагандаги мағлубият фарқни 5тага етказди.

Ўйиннинг биринчи бўлимидаги асосий шахс мезбонлар ярим ҳимоячиси Мауро Арамбарри бўлди: аввалига у урган голни ҳакам инобатга олмади – у берган зарба йўл-йўлакай офсайдда турган жамоадошига текканди. 5 дақиқа ўтиб у қўполлик учун майдондан ҳайдалди ва «Хетафе» ўйиннинг қолган қисмини камчиликда ўтказди. Лекин бу майдон эгаларини янада руҳлантириб юборди ва кетма-кет ҳужумлар уюштирилиши давом этди. Иккинчи бўлимда Бергара «Хетафе»ни олдинга олиб чиқди. У урган гол ўйинда ягоналигини сақлаб қолди, ўйиннинг қолган қисмида «Валенсия» уюштирган ҳужумлар самарасиз кетди ва 0:1. Мавсумдаги илк мағлубият.

«МАТРАСЧИЛАР»НИНГ ДИВИДЕНДЛАРИ

АТЛЕТИКО – РЕАЛ СОСЬЕДАД 2:1 (0:1, 2:0)
Голлар: 0:1 – 29, пенальти Виллиан Жозе, 1:1 – 63 Филипе Луис, 2:1 – 88 Гризманн.
Огоҳлантиришлар: Годин (40), Прието (50), Рульи (73).

Рақибларнинг хатоларидан «Атлетико» фойдаланиб қолди, жамоа икки ой ичида илк марта ўз уйида кечган учрашувда ғалабага эришди. «Матрасчилар» охирги марта 23 сентябрь куни «Севилья»га қарши кечган уй учрашувида ғалаба қозонганди (2:0). Шундан сўнг, Диего Симеоне шогирдлари дуранглар гирдобига тушиб қолди ва турнир жадвали пешқадамидан 8 очко ортда қолиб кетди. Энди инқироз даври ўтиб кетган кўринади – барча турнирлар доирасидаги охирги 3 учрашувда ғалаба қайд этилганди, тўплар нисбати - 10:0, шанба куни «Ваньда Метрополитано»да «Реал Сосьедад»га қарши кечган учрашув 2:1 ҳисобидаги ғалаба билан якунланди.

Бу ғалаба иродали ғалабага айланди – «атлетлар» Виллиан Жозе пенальтидан урган голга икки гол билан жавоб қайтаришига тўғри келди. Иккинчи бўлимда Филипе Луис ҳисобни тенглаштирди, Антуан Гризманн эса яна қутқарувчи ролини бажариб, охирги дақиқаларда ғалаба голини урди. Сан-Себастьян жамоасининг собиқ футболчиси сифатида ушбу француз бу голни нишонламади. «Атлетико» энди очколари сонини 30тага етказиб, «Валенсия»га деярли етиб олди (31), шунингдек, «Барса» (36) билан орадаги фарқ қисқарди 28тадан очко тўплаган «Реал» ва «Севилья» ортда қолдирилмоқда.

15-тур учрашувлари