«Янукович ҳаммасига айбдор». Яценюк Қрим бўйича кескин баёнот берди

Украина собиқ бош вазири Арсений Яценюкнинг фикрича, Қримнинг Россия томонидан босиб олиниши – собиқ президент Виктор Янукович ва Россия президенти Владимир Путиннинг фитнаси оқибатидир.

Бу ҳақда Яценюк Киевнинг Оболон судида маълум қилди. У ерда Виктор Янукович иши бўйича эшитувлар ўтказилмоқда, собиқ президент давлатга хиёнат қилишда ҳамда Украинага қарши ҳарбий тажовузкорликка кўмак кўрсатишда айбланмоқда.

Суд Яценюк ва Аваковни Янукович иши бўйича гувоҳлар сифатида сўроқ қилишга 7 декабрь куни рухсат берди. Айблов томонининг гувоҳлари рўйхатида Украина президенти Пётр Порошенко, Олий рада спикери Андрей Парубий, Миллий хавфсизлик ва мудофаа кенгаши котиби Александр Турчинов ҳамда бошқа юқори мансабли мулозимлар бор, деб хабар қилмоқда Би-би-си.

Яценюк Януковичнинг Владимир Путинга ёзма мурожаати ҳақида эслатиб ўтган, у, Украина собиқ бош вазирининг фикрича, ярим оролни босиб олишда катта ўрин тутди.

"Януковичнинг мурожаати Қримга Россия қўшинлари киритилишини қонуний деб аталишида муҳим ўрин тутди, - дея Яценюкнинг баёнотидан иқтибос келтирада Би-би-си. – Мен Виктор Янукович ҳамда Владимир Путин шундай баёнот ҳақида келишиб олганини истисно этмайман. Бу Россия учун жуда муҳим баёнот эди, улар шу йўл билан қўшинлар киритишга қонуний тус беришмоқчи бўлишган, Қримни ноқонуний босиб олиш бўйича мажбуриятдан, шу жумладан халқаро тузилмаларда ҳам қочишга ҳаракат қилишган".

Януковичнинг ҳимоячилари эса судда Қримнинг Россияга қўшилишида расмий Киевнинг амалдаги раҳбарлари айбдор эканини исботлаш ниятида. 

"Биз шундай фикрдамизки, Қримнинг босиб олиниши Виктор Янукович ҳаракатлари туфайли эмас, балки Евромайдандан сўнг ҳокимият тепасига келган Украина раҳбариятининг ҳаракатсизлиги сабаб рўй берди", - дея Януковични ҳимоя қилиш билан шуғулланаётган "Aver Lеx" компанияси юристи Виталий Сердюкнинг сўзларини келтиради Би-би-си.

Янукович 2014 йилнинг февралида юз берган оммавий норозилик намойишлари вақтида Украинадан қочиб чиқиб кетди. Украинада унга қарши бир неча жиноят иши қўзғатилган, жумладан, давлатга хиёнат қилиш бўйича ҳам. Бу айбловга Януковичнинг Россия президенти Владимир Путинга Украинага рус қўшинларини киритиш ҳақида илтимос бўлган ёзма мурожаати асос қилиб олинган, дея тушунтиришганди Украина прокуратурасидан. 

Шунингдек, Бош прокуратурадагиларнинг фикрича, айнан Янукович 2014 йилнинг қиш ойларида юз берган норозилик намойишлари вақтида одамларнинг ҳалок бўлишига айбдордир. Терговга кўра, у ҳуқуқни муҳофаза қилиш органлари раҳбарларига Евромайдан фаолларини ўққа тутиш ҳақида буйруқ берган.

Украинадаги норозилик намойишлари вақтида 106 киши ҳалок бўлди, мингдан ортиқ фаол жароҳатланди. Шунингдек, ҳуқуқни муҳофаза қилиш идораларининг 19 нафар ходими ҳам ҳаётдан кўз юмди.

Януковичнинг ўзи эса ҳар доим зўравонликка қарши бўлгани ва куч маҳкамаларига қуролни қўллаш ҳақида буйруқ бермаганини иддао этади. Собиқ президент бир неча марта давлатга хиёнат қилиш бўйича ўз айбини тан олмаслигини маълум қилган ҳамда яқинда Украина Бош прокуратурасига “2014 йилнинг февралида ҳокимиятни куч ишлатиш йўли билан эгаллаб олиш” бўйича ариза билан мурожаат қилди. Бош прокуратура ушбу мурожаат бўйича судга қадар суриштирувни ўтказмоқда. 

2016 йилнинг октябрида Янукович Россияда унга тақдим этилган вақтинчалик бошпана асосида яшаётгани маълум бўлганди. Россия ИИВ ўша йилнинг октябрида Украина собиқ президентининг вақтинчалик бошпана учун ҳуқуқини яна бир йилга узайтирди.