Роналдуда норозилик учун яна сабаб пайдо бўлди

«Реал» клуби ҳужумчиси Криштиану Роналду барча футболчилардан кўпроқ маош олишни истамоқда ва худди шу мазмундаги талабни «Қироллик клуби» президенти Флорентино Пересга билдирмоқчи.

Marca нашри берган хабарга кўра, Португалия терма жамоаси футболчиси «Барселона» ҳужумчиси Лионель Месси ва «ПСЖ» етакчиси Неймарнинг ўзидан кўпроқ маош олишини қабул қила олмаяпти. Месси каталонияликлар билан тузган янги шартномасига кўра, барча бонуслар билан 50 млн евро ишлаб топиши мумкин бўлади. Роналду эса бешинчи «Олтин тўп» унинг фаолиятида янада кўпроқ ишлаб топишини талаб қилиш учун етади.

Роналдунинг «Реал» билан амалдаги шартномаси 2021 йилнинг ёзига қадар мўлжалланган, бу дегани у «қаймоқранглилар» сафида 36 ёшга қадар тўп суриши мумкинлигини билдиради. Манбаларда ёзилишича, сўнгги бор шартнома янгиланганида Роналду катта миқдорда пул ишлаб топган, аммо бу уни қониқтирмаяпти ва янги битим имзолаб, энг камида Мессидек маош олишни истаяпти.