КХДР Россия ёрдамида кўмир билан савдо қилмоқда – ОАВ

Фото: Denis Balibouse/Reuters

КХДР Жанубий Корея ва Японияга кўмирни рус портлари орқали етказиб берган. Бу БМТ санкцияларига қарамай содир бўлган, деб хабар қилмоқда Reuters Ғарбий Европадаги разведка манбаларига таянган ҳолда.

Агентлик маълумотига кўра, Шимолий Корея камида уч марта кўмирни Находка ва Холмск порти орқали ўтказган. АҚШ хавфсизлик органларидаги манба бу маълумотни тасдиқлади ҳамда Россия орқали кўмир билан савдо қилиш давом этаётганини таъкидлади.

Эслатиб ўтамиз, аввалроқ Reuters агентлиги Россия танкерлари ўтган йилнинг октябрь ва ноябрида Шимолий Корея кемаларига бир неча марта нефть қуйиб бергани, бу санкцияларга қарамай юз бергани ҳақида хабар қилганди.