Хитойда 600 км/соат тезлик билан ҳаракатланувчи поезд ишга туширилади  

Хитойда 600 км/соат тезлик билан ҳаракатланувчи маглёв-поезд линиясини қуриш техник режаси тасдиқланди. Бу ҳақда лойиҳа ташаббусчиси CRRC Qingdao Sifang компаниясига иқтибос келтирган ҳолда People’s Daily Online хабар бермоқда. 

Техник режани 19 академик ва мутахассис кўриб чиққан. Лойиҳа кўриб чиқилгандан кейин бир овоздан маъқулланган.  

Магнит левитациясига (муаллақ турувчи) асосланган юқори тезликда ҳаракатланувчи поездлар илғор технология ҳисобланади ва катта эътибор қаратади. Айни вақтда бу борада рекорд натижа япон поездига тегишли бўлиб, у синов вақтида 603 км/соат тезликка эришган. Германияда ишлаб чиқариладиган бу турдаги поездлар эса 505 км/соатга эриша олади. Хитойда ҳаракатланувчи маглёв-поездлар анча “камтарона” кўрсаткичларга эга, уларнинг максимал тезлиги 430 км/соат тезликни ташкил қилади. 

Агар ушбу лойиҳа муваффақиятли амалга ошса, бу Хитой учун катта илғорлаш бўлади. Мутахассисларнинг фикрича, янги транспорт тури анъанавий поезд ва самолётлар ўртасидаги бўшлиқни эгаллайди. Режага кўра, тезкор маглёв-поезднинг биринчи намунаси 2020 йилда 5 кмлик трассада синовдан ўтказилади 

Ўтган йил охирида Пекинда илк маглёв-линия барпо этилди. Поезд Пекиннинг ғарбий қисмидаги атроф ҳудудларни бирлаштирган. Поезднинг ҳаракати 100 км/соатни ташкил қилади.  

Маглёв-поезд магнит левитациясига асосланган транспорт тури бўлиб, унда поезд магнитдан итарилиш ҳисобига ҳаракатланади.