Шоҳжаҳон Эргашев янги рейтингда кескин юқорилади

Профессионал бокснинг супер енгил (63,5 кг.гача) вазн тоифасида мусобақаларда иштирок этаётган ўзбекистонлик боксчи Шоҳжаҳон Эргашев жаҳон бокс ассоциацияси WBAнинг февраль ойидаги янги рейтингида кучли 15 спортчи сафидан ўрин олди.

Ташкилот расмий сайти томонидан эълон қилинган февраль ойи учун рейтингда Шоҳжаҳон Эргашев жуда катта ўсишга эришган ва бир йўла 12-поғонадан ўрин олган.

Эслатиб ўтамиз, Шоҳжаҳон бундай юқорилашига унинг январ ойидаги рейтингда 8-ўринда бораётган Сонни Фредрикссон устидан қозонилган ғалабаси сабаб бўлди. Олдинроқ спортчининг ўзи тахминан 5-8 ўринларга кўтарилишини кутаётгани ҳақида гапириб ўтганди.

WBA барча вазн тоифаларида фақат кучли 15талик спортчилар рейтингини эълон қилиб боради ва эндиликда ушбу йўналишда ТОП-15ликка кирган ўзбекистонлик боксчилар сони икки нафарга етган. Бунгача ярим ўрта (66,68 кг.гача) вазн тоифасида рингга кўтарилаётган йўналишнинг кумуш камари эгаси бўлган Қудратилло Абдуқаҳҳоровгина бу рейтингда бор эди. Январда рейтингда 5-ўринда бўлган Абдуқаҳҳоров бу сафар бир ўрин пастлаб 6-ўринга тушган. Бироқ у ҳамон чемпионликка даъвогарлик жангини ўтказиш ҳуқуқига эга бўлиб турибди. Олдинроқ, Абдуқаҳҳоров филиппинлик Мэнни Пакьяо билан (рейтингда 2-ўринга кўтарилди) рингга чиқиши мумкинлиги айтилганди.

Эргашевдан фарқли равишда Абдуқаҳҳоров WBC рейтингида 5-поғонада, IBF йўналиши рейтингида эса 8-ўринда бормоқда ва даъвогарлик жангида иштирок этиш ҳуқуқига эга бўлиб турибди. Эргашев эса WBC эълон қилган ТОП-50лик, IBF эълон қилган ТОП-15лик рейтингларда қайд этилмаган.