Цукербергнинг имижи ортидан кузатиши керак бўлган ходим ярим йилгина дош бера олди

Тэвис Макгинн ўтган йил Facebook’га ишга кирганди. У компанияда маркетинг тадқиқотлари билан шуғулланишига умид қилганди. Бироқ бунинг ўрнига унга одамлар компания раҳбари Марк Цукербергга қандай муносабатда эканликларини кузатиш вазифаси топширилган. 

Моҳиятан, Макгинн ҳар куни дунёдаги энг йирик ижтимоий тармоқ асосчиси Цукерберг бераётган баёнотлар таъсирида унинг имижи қандай ўзгараётганини текшириши керак бўлган. Бундай лавозимлар йирик сиёсатчилар штабларида мавжуд. Бироқ тадбиркорлар ва ҳаттоки йирик компаниялар топ-менежерлари ҳам вақти-вақти билан бундай ходимларга эҳтиёж сезадилар.   

Макгинн The Verge нашри журналистларига унинг мажбуриятларига бутун дунё бўйлаб “қарашлар” гуруҳларини ташкиллаштириб, одамлар Цукербергга ишониш-ишонмасликларини, нима учун уни ёқтиришларини ва умуман у ҳақда эшитган-эшитмаганларини аниқлаш кирган. 

Бунда нафақат Цукербергнинг тадбирларда чиқишлари ёки ижтимоий тармоқдаги у ёки бу ўзгаришларни эълон қилишини баҳолашга тўғри келган. Бундан ташқари, мисол учун, Цукерберг иштирокидаги пикникнинг онлайн-намойиши ортидан ҳам кузатиш керак бўлган. Макгиннинг айтишича, Цукерберг одамлар унинг ҳар бир ҳаракатини қандай қабул қилишларини билмоқчи бўлган.

“Facebook – бу Марк”, деб айтган Макгинн. Унинг фикрича, 33 ёшли Маркда ижтимоий тармоқнинг 2 миллиардлик аудиторияси устидан ҳаттоки президентларда бўлмаган, мисли кўрилмаган ҳокимият бор. Макгинн компанияда ярим йил ишлагач, ижтимоий тармоқ дунёни фақат ёмон томонга ўзгартириши ҳақидаги хулосага келиб, у ердан бўшаб кетган. “Мен у ерда 6 ой ишладим ва мен компания ичида бўла туриб,  Facebook’га таъсир қила олмаслигимни англадим. Мен компания қадриятларини, унинг тартиб-қоидаларини ўзгартира олмайман. Мен жуда оптимистик кайфиятда бўлгандим”, деб айтган Макгинн.

Макгинн ўзи олиб борган тадқиқотларнинг бирорта натижасини ошкор қилмаган. Facebook’да ҳам унинг иши натижаларига изоҳ берилмаган, бироқ компания 2 йилдан бери фойдаланувчиларнинг Цукербергга муносабатларини кузатиш билан шуғулланиши айтилган.

2017 йилда Цукерберг АҚШнинг ҳар бир штатига ташриф буюриб, уларнинг аҳолиси билан мулоқот қилиш вазифасини ўз олдига қўйган. Цукербергнинг бу ташрифлари кўпроқ президентликка номзодларнинг сайловчилар билан учрашувларини эслатиб юборган. Ҳаттоки Марк президентликка номзодини қўймоқчилиги ҳақида гаплар ҳам урчиган, бироқ тадбиркорнинг ўзи бунга ҳеч қандай изоҳ бермаган.