122 та афтершок. Мексикада 7,2 магнитудали кучли зилзила юз берди 

16 февраль кечки пайт Мексиканинг жанубидаги Оахака штатида кучли зилзила юз берди. Маълумотларга кўра, зилзила магнитудаси 7,2 ни ташкил қилган, ўчоғи 12 км чуқурликда бўлган. 

Штат раҳбарияти  кучли зилзила қурбонларга олиб келмагани, бироқ моддий зарар етказганини маълум қилди. Шунингдек, зилзиладан кейин 122 та афтершок қайд қилинган.  

“Соат 19.30гача (Тошкент вақти билан соат 6.30) 122 та афтершок қайд қилинган”, деб маълум қилинган Миллий сейсмология хизматида. 

Кучли зилзила Мехиконинг минглаб аҳолисини кўчага чиқишга мажбур қилган. Одамлар шаҳарнинг нисбатан хавфсиз ҳудудларида, иложи борича иншоотлардан узоқроқда тўпланиб олишган. Шаҳарда светофорлар ўчиб қолган, электр таъминоти қисман узилган, катта тирбандликлар юзага келган. Одамлар уйларига қайтишга қўрқмоқдалар. 

“РИА Новости” ахборот агентлиги мухбирининг маълум қилишича, зилзила бошланишидан тахминан 15 сония олдин огоҳлантирувчи сигнал овозларини эшитган ва биринчи қаватдаги хонадан кўчага югуриб чиқишга улгурган.  

Таъкидланишича, цунами пайдо бўлиши эҳтимоли рад этилган. 

Мексикаликлар ярим йил ичида учинчи марта кучли зилзилани бошдан кечирмоқдалар. Ўтган йилнинг 7 ва 19 сентябрида иккита кучли зилзила оқибатида юзлаб одамлар ҳалок бўлган.