Токиода тақдим этилган «Мазда» Женевадаги энг яхши прототип сифатида тан олинди

Женева автосалони доирасида бўлиб ўтган Car Design Night тадбирида Mazda Vision Coupe прототипи энг яхши концепт-кар сифатида тан олинди. Япония маркаси прототипи 2017 йилнинг ноябрида, Токидаги моторшоуда дебют қилганди.

Ғолиб 18 кишидан иборат бўлган ҳайъат томонидан аниқланди. Унга йирик, жаҳондаги етакчи автомобиль ишлаб чиқарувчилар дизайнерлик бўлимлари раҳбарлари ҳам киради, бироқ айнан кимлар бўлганига ойдинлик киритилмади.

Бу Mazda Vision Coupe қўлга киритган биринчи соврин эмас. Январь ойи охирида Париждаги автомобиль фестивалида япон маркаси прототипи 2017 йилнинг энг чиройли концепт-кари деб топилганди.

Mazda Vision Coupe 21 дюймли ғилдиракларга эга тўрт эшиклик купе саналади. Концепт-кар ички дизайнида чарм ва ёғоч ишлатилган, марказий консоль устки қисмида дисплей бор. Mazda прототип техникаси ҳақида ҳеч қандай маълумот бермаган.