Туркманистон президентининг ўғли Сардор Бердимуҳамедов парламент депутати этиб сайланди

Туркманистон президенти Гурбангули Бердимуҳамедовнинг ўғли Сардор мамлакат парламенти депутати этиб сайланди, дея хабар беради «Нейтральный Туркменистан» газетаси. Нашрда сайланган депутатлар рўйхати эълон қилинди.

Президент ўғлининг парламентга номзоди «Душак» 25-сайлов округидан қўйилди. Овоз бериш 25 март, якшанба куни бўлиб ўтди.

Бердимуҳамедовдан ташқари, Кака тумани 10-сонли ўрта мактабининг ўқув-тарбия ишлари бўйича директор ўринбосари Ўғулжарон Гурдов ҳам депутат мандати учун кураш олиб борди.

Сардор Бердимуҳамедов сайловчиларнинг 25 700 овозини (91,42%) олди. Ўғулжарон Гурдов учун 2 412 сайловчи (8,58%) ўз овозини берди. Бу ҳудудда ҳаммаси бўлиб 30 316 киши сайловчилар рўйхатига киритилди.

Сардор Бердимуҳамедов 1981 йилда туғилган. С.А.Ниёзов номидаги Туркманистон қишлоқ хўжалик университетини муҳандис-технолог мутахассислиги бўйича тамомлаган. 2008-2011 йилларда Россия Ташқи ишлар вазирлигининг Дипломатия академиясида таҳсил олган ва халқаро муносабатлар бўйича мутахассислик олган. 2011-2013 йилларда Женевадаги Хавфсизлик сиёсати марказида ўқиган ва Европа ҳамда халқаро хавфсизлик бўйича мутахассисликка эга бўлган.

Ҳозирда у қонунчилик ва унинг нормалари бўйича парламент қўмитаси раиси лавозимини эгаллайди, майор ҳарбий унвонига эга.