Cурия кучни кўрсатиш учун жой эмас – Эрдўған 

Туркия Суриянинг кучни кўрсатиш учун жойга айланаётганидан қаттиқ ташвиш билдирмоқда. Ўз ҳарбий қудратига таянувчи давлатларнинг бундай ёндашувига йўл қўйиб бўлмайди, деб айтди Туркия президенти Ражаб Тоййиб Эрдўған. 

Эрдўғаннинг айтишича, Туркия Сурияга тинчлик ва барқарорлик олиб келган ягона давлатдир.

“Бошқа ўйинчилар ҳаракат қилаётган Суриянинг бошқа барча ҳудудларида зўравонлик, беқарорлик ва вайронгарчилик ҳукм сурмоқда”, деб айтди Эрдўған. Унинг айтишича, Анқаранинг таъсири унинг ташқарисидан анча ергача ёйилади. “Туркия ўзини биродарларига ёрдамга келишга, уларга дунёнинг исталган нуқтасида ёрдам қўлини чўзишга мажбур, деб ҳисоблайди”, деб таъкидлаб ўтган Туркия президенти. 

Эрдўған “қотил Башар Асад тузуми”ни қўллаб-қувватлаётган давлатлар сиёсатини ҳам хато деб атаган. “Демократик иттифоқ” (PYD) террорчилик ташкилотини қўллаб-қувватлаётганлар ҳам хато қилишмоқда. Туркия Суриядаги бу иккита хавфга қарши охиригача курашади”, деб айтган Эрдўған. 

Эрдўған Анқара Сурияда тўлиқ хавфсизлик таъминлангунча бу давлатда қолишини таъкидлаб ўтган.  

Эрдўғаннинг таъкидлашича, баъзи кучлар PYD террорчиларини “ҳимоя қила оламан” деб янглиш ўйлайди. Унинг айтишича, Туркия PYD’нинг барча жангариларини барибир йўқ қилади. “Сурия ва Ироқдаги спектаклни тугатиш керак. Ниқоблар олиб ташланиши лозим”, деб айтган Эрдўған.

Эрдўған Анқара шубҳасиз иттифоқдош давлатлар ҳарбийларига куч ишлатмаслигини таъкидлаб ўтди. “Шу билан бирга, биз ҳамкорларимизга PYD террорчиларидан узоқлашишни қатъиян тавсия қиламиз”, деб огоҳлантирган Эрдўған.