"Аватар" фантастик кинолентасининг давоми ҳисобланган тўрт фильм сценарийси тайёр, илк икки картина съёмкалари олиб борилмоқда. Deadline Hollywood журналига кўра, Америкалик режиссёр Жеймс Кэмерон шундай баёнот билан чиққан.
Кэмерон Манхеттен-Бич (Калифорния штати) шаҳрида оммавий ахборот воситалари билан кечган учрашувда сиквеллар устида олиб борилаётган ишлар ҳақида сўзлаб берди. Режиссёрнинг аниқлик киритишича, мана 100 кундирки, бир вақтнинг ўзида ҳам "Аватар 2", ҳам "Аватар 3" съёмкалари кетмоқда. Картиналар 2020 ва 2021 йилларда катта экранларга чиқиши кутилмоқда.
Кэмерон шунингдек фильмлар занжирининг тўртинчи ва бешинчи қисмлари сценарийлари якунланганини ҳам маълум қилди. Режиссёрнинг сўзларига кўра, "Аватар 2" ва "Аватар 3" ленталари намойишидан сўнг кейинги картиналарни ишлашга киришилади. "Аватар 4" ва "Аватар 5" фильмлари тахминан 2024 ва 2025 йилларда тақдим этилади.
Режиссёр фильмлар серияларига бир неча авлод ҳақидаги "оилавий сага" дея таъриф берди. Унинг изоҳларига кўра, сиквелларда, хусусан, биринчи фильмдаги қаҳрамонларнинг улғайиши ва уларнинг оилалари ҳақида сўз юритилади.
Американинг "Аватар" фантастик фильми 2009 йилда экранларга чиққан. Картина тўққиз йўналишда "Оскар" мукофотига даъвогарлик қилган ва уларнинг учтасида ғалаба қозонган. Бундан ташқари, лента икки марта "Олтин глобус" мукофотини қўлга киритган. "Аватар" тарихдаги энг кассабоп фильм ҳисобланади. Унинг намойишидан тушган даромадлар 2,7 миллиард доллардан ошади.
