Hyundai компанияси Пекин автосалонида ўрта ўлчамли Lafesta седанини тақдим қилди. Машина марканинг янги услуби Sensuous Sportiness – “ҳаяжонли спорт кўриниши”да бажарилган.
Янги услубдаги илк концепт-кар ўтган ой Женева автосалонида намойиш қилинган Le Fil Rouge бўлган, Lafesta эса шу услубда бажарилган илк серияли ишлаб чиқарилувчи автомобил бўлади. Унинг ўзига хос жиҳатлари радиатор панжараси билан бирлашиб кетгандай кўринувчи “жаҳлдор” кўринишдаги оптикаси, юк бўлими эшигидаги кичик “думча” ҳисобланади.
Машина ўлчамларига кўра, Hyundai Elantra седани негизида қурилган: ғилдираклар базаси мос келади (2700 мм), “Лафеста” узунлиги эса 90 мм га каттароқ ва 4660 мм ни ташкил қилади.
Машина капоти остида 1,6 литрли бензин турбомотори жойлашган, у 7 поғонали “роботлаштирилган” узатмалар қутиси билан бирга ишлайди. Двигателнинг аниқ кўрсаткичлари йўқ, бироқ Hyundai’нинг бошқа моделларида бу мотор 177 от кучидан 204 от кучигача қувват беради.
Lafesta Хитойдан ташқарида ҳам сотилиши-сотилмаслиги номаълум, Европада эса Hyundai’нинг шунга ўхшаш, i30 хэтчбеги негизида қурилган ихчамроқ машинаси бор. Hyundai Lafesta Хитойнинг Чунцинидаги Beijing Hyundai қўшма корхонасида жорий йилда йиғила бошланади.
