Америкадаги Hyundai заводида миграцион операция: 500 га яқин киши қўлга олинди, Сеул Вашингтонни огоҳлантирди

АҚШнинг Жоржия штатидаги Hyundai заводида иммиграция идоралари рейд ўтказиб, қарийб 500 кишини ҳибсга олди. Бу президент Трампнинг катта депортация сиёсати остида бўлмоқда. Қўлга олинганларнинг аксарияти 3000 гектар майдонда қурилган электромобиллар ишлаб чиқарувчи завод ишчилари, Корея фуқароларидир.

Фото: Hyundai

Жанубий Корея операциядан “ташвиш ва афсусда” эканини билдирди ва АҚШ ҳукуматини корейс фуқаролари ҳуқуқларини ҳурмат қилишга чақирди. Ички хавфсизлик департаментининг BBC’га айтишича, бу одамларга “ноқонуний меҳнат амалиёти ва бошқа оғир федерал жиноятлар” айбловлари туфайли қидирув эълон қилган.

Бироқ АҚШ иммиграция идоралари бу шунчаки рейд эмаслиги, балки кўп ойлик жиноий терговнинг бир қисми эканини билдирмоқда.

“Бу кўп ойлик жиноий тергов бўлди, унда биз далилларни ишлаб чиқдик, суҳбатлар ўтказдик ва ҳужжатларни тўпладик, бу далилларни тақдим этдик. Сўнгра суд қидирувга рухсат берди, деди Атлантадаги ички хавфсизлик бўйича махсус агент Стив Шранк.

Унинг қўшимча қилишича, “бу миллий хавфсизлик бўйича терговлар тарихидаги энг йирик операциялардан бири бўлмоқда”.

Рейд президент Доналд Трампнинг иккита асосий устувор йўналиши – АҚШда ишлаб чиқаришни ривожлантириш ва ноқонуний иммиграцияга қарши кураш асосида олиб борилган. Трампнинг ўзи жума куни Овал кабинетда корейсларнинг қўлга олинишига тўхталаркан, “улар ноқонуний муҳожирлар эди ва ICE шунчаки ўз ишини қилди”, дея қисқа тўхталди.

Журналистлар президентдан бу операция Сеул билан алоқаларга салбий таъсир қилмаслиги ҳақида сўради.

“Яхши, биз бошқа давлатлар билан тил топишмоқчимиз ва ажойиб, барқарор ишчи кучига эга бўлишни хоҳлаймиз. Мен тушунганимдек, бизда жуда кўп ноқонуний чет элликлар бор, улар яхши одамлар эмас”, дея жавоб қайтарган Трамп.

Бу ишчилар Байден билан бирга келган одамлар. Улар ноқонуний йўл билан келишган, дея қўшимча қилди президент.

Иммиграция хизмати расмийларининг билдиришича, операция давомида мамлакатда ноқонуний бўлган ёки ноқонуний ишлаган 475 га яқин киши қўлга олинган.

Улар Жоржия штатининг Фолкстон шаҳридаги АҚШ Иммиграция ва божхона назорати (ICE) муассасасида қолмоқда, агентлик уларни кейин қаерга кўчиришни ҳал қилмоқда.

Ҳибсга олинганларнинг 300 нафари Корея фуқаролари экани айтилмоқда. Hyundai Motor компанияси ўз баёнотида “вазиятни диққат билан кузатиб бораётгани ва муайян вазиятларни тушунишга ҳаракат қилаётганини” айтди. “Бугунги кунга кўра, ҳибсга олинганларнинг ҳеч бири тўғридан тўғри Hyundai’да ишламаслигини биламиз”, - дейилади компания ахборотида.

Жанубий Корея рейдга жавобан воқеа жойига дипломатларни жўнатаётганини ва АҚШнинг Сеулдаги элчихонаси билан боғланиб, Корея фуқаролари ҳуқуқлари масаласида АҚШни “ўта эҳтиёткор бўлишга” чақирганини айтди.