Франция президенти Эммануэль Макроннинг маълум қилишича, Қўшма Штатлар раҳбари Дональд Трамп Эрон билан ядро келишувини қўллаб-қувватламайди. Бу ҳақда РИА «Новости» хабар бермоқда.
«Менинг фикримча, Трамп келишувни ҳимоя қилишга жуда ҳам тайёр тургани йўқ. Мен бу борада унинг аниқ позициясини етказдим, деб ҳисоблайман», - дея айтиб ўтди Макрон Трамп билан музокаралар якунлари бўйича.
Шу билан бирга, Франция раҳбарининг қайд этишича, мамлакатлар Эрон муаммосини ҳал қилиш учун саъй-ҳаракатларни бирлаштириши лозим.
«Бирлашган саъй-ҳаракатларимиз бизни янада кучлироқ қилади. Бу бизнинг умумий мақсад бўлиши керак», - дея таъкидлаб ўтди Макрон.
Эслатиб ўтамиз, аввалроқ Европа Эрон билан ядро келишувини сақлаб қолиш йўлини топгани хабар қилинганди. Маълумотларга кўра, Буюк Британия, Германия ва Франция АҚШ билан келишув борасида келишиб олган. Қўшма Штатлар президенти Дональд Трамп, кутилишича, Эронга қарши навбатдаги санкциялар жорий этишни тўхтатиб туради. Ядровий келишув катта ўзгаришга юз тутмайди, бироқ унинг алоҳида қисмлари ўзгартирилади.
