АҚШ президенти Доналд Трамп якшанба куни кечқурун Оқ уйда Anthropic (Claude AI) компаниясининг ҳаммуассиси ва бош директори Дарио Амодей билан хусусий кечки овқат уюштирди. Учрашув сунъий интеллект (СИ) ривожини секинлаштириш ҳақидаги қизғин баҳслар ва компаниянинг Пентагон билан давом этаётган низоси фонида бўлиб ўтди. Учрашув натижалари ҳозирча ошкор қилинмаган.
Илк яккама-якка учрашув
Кечки овқат ҳақида дастлаб Axios нашри хабар берганди. Кейинроқ уни Трампнинг ўзи тасдиқлади. Президент Эндрюс ҳарбий базасига қайтгач, журналистларга Амодей билан овқатланишини айтди ва уни «жуда ҳурматли» инсон деб атади. New York Times'га кўра, бу икки раҳбарнинг илк яккама-якка учрашуви бўлди. Оқ уй расмийси эса Америка суперинтеллект соҳасида дунёга етакчилик қилишини ва бунда истеъмолчиларни ҳимоя қилишини таъкидлади. Оқ уй ҳам, Anthropic ҳам нашрга изоҳ бермаган.
Ўтган ҳафта Трамп Хитой раиси Си Жинпинг шарафига зиёфат бериб, Америкадаги деярли барча IT ва AI гигантлари раҳбарларини таклиф қилганди. Axios'га кўра, айнан Амодей бошқа режаси сабабли тадбирга келолмаган ва Трамп кейин уни шахсан таклиф қилган. Forbes эса Амодей таклиф этилганлар рўйхатида умуман бўлмаганини ёзди.
Сешанба куни президент Трамп – Вакиллар палатаси спикери Майк Жонсон билан бирга етакчи СИ компаниялари раҳбарларини қабул қилади. Тадбирда америкаликларга федерал маълумотлардан фойдаланишда ёрдам берадиган янги ҳукумат сайти тақдим этилади. Times'нинг эътибор қаратишича, Оқ уй маъмурияти СИ хавфлари борасидаги хавотирлар фонида технология раҳбарлари билан учрашувларга тобора кўпроқ эътибор қаратмоқда.
Секинлаштириш чақириғи
Учрашув олдидан кескинлик сентябрь бошида, СИ хавфсизлиги ҳақидаги баҳс кенг жамоатчилик муҳокамасига чиққанидан кейин кучайди
