Киевда «Ливерпуль» ишқибозлари ҳужумга учради

«Ливерпуль» ишқибозлари Киев шаҳридаги, ЕЧЛ финали бўлиб ўтиши керак бўлган Олимпийский стадионидан унча узоқ бўлмаган ерда жойлашган Rooster ресторанида безорилар ҳужумига учради.   

«Биз шунчаки тушлик қилаётган эдик ва ўз ишларимиз билан шуғулланаётгандик. Тўсатдан ҳужум рўй берди. Мен бу ерга муштлашиш учун эмас, балки футбол кўриш учун келганман. Биз Киевга тўрт соат аввал етиб келдик ва ҳужумга учрадик, бу даҳшатли бўлди», - дея жароҳат олганлардан бирининг сўзларини келтиради Mirror.

Таъкидланишича, ниқобларда бўлган тахминан 20 киши англиялик ишқибозларга қарата шишалар, столлар ва стулларни улоқтирган. Ҳодиса оқибатида бир неча ишқибоз боши ва бўйнидан жароҳат олгани айтилмоқда.

Ҳуқуқни муҳофаза қилиш орган ходимлари ҳужум қилганлардан икки нафарини қўлга олган.

Киевда 26 май куни ЕЧЛ финали бўлиб ўтади. Майдонда «Ливерпуль» ва Мадриднинг «Реал»и тўқнаш келади.

Эслатиб ўтамиз, аввалроқ Киев шаҳри мэри Виталий Кличко «Реал»нинг 2000дан ошиқ мухлиси ЕЧЛ финали учун чипталарни қайтариб бергани ҳақидаги маълумотни ёлғон, деб атаганди.