Шимолий Корея 24 май куни Пхунгеридаги ядровий полигонини тўлиқ бузиб ташлади. Бу ҳақда Шимолий Корея марказий телеграф агентлиги маълум қилди.
Хабарда айтилишича, полигон бузилиши вақтида атроф-муҳитга радиация тарқалмаган.
“Ядровий полигон барча туннеллар портлатиш йўли билан тўлиқ бузилиб, уларга киришни буткул ёпадиган қилиб йўқ қилинган. Шу билан бирга қўриқлаш объектлари ва кузатув постлари ҳам портлатилган”, деб айтилган хабарда.
Пхунгери Шимолий Корея ядровий дастурининг энг муҳим объектларидан бири ҳисобланган. 2006 йилдан 2017 йилгача бу полигонда олтита ядровий синов, жумладан термоядро бомбаси синови ўтказилган.
Ядровий полигоннинг бузилишини 5 та давлатдан таклиф қилинган журналистлар кузатиб боришган.
