Кайфиятнинг ранги — қаймоқранг!

«Реал» Европа чемпионлар лигасининг қаторисига учинчи финалида «Ливерпуль» устидан ғалабага эришиб, кўҳна қитъанинг энг нуфузли турниридаги совринлари сонини 13 тага етказиб қўйди.

Албатта, «Ливерпул»нинг энг ишонган юлдузи мисрлик Муҳаммад Салоҳ жароҳатланмаганида ўйин бошқача тус олиши мумкин эди. Лекин аввалдан таъкидланганидек, иштиёқдан тажриба устун бўлди. Ҳамма айб Рамосда дейишлари мумкин, лекин у бечора ҳам оғир кубокни боши узра даст кўтаришдан абжағи чиқиб кетмоқда.

Ҳақли равишда ўйиннинг энг яхши ўйинчиси деб топилган Гарэт Бейлнинг дубли (у захирадан майдонга тушиб, финалда дублга эришган илк футболчи бўлди), «Ливерпуль» дарвозабони Лорис Кариуснинг нўноқларча ҳаракати эвазига киритилган голлар билан эсда қоладиган бўлди мазкур финал.

64-дақиқада Бейлнинг қайчи усулида киритган биринчи голи ҳали узоқ йиллар ТВ экранларини безаб турса керак.

Эслатиб ўтамиз, 2018/19 мавсумдаги Европа чемпионлар лигаси финали Испания пойтахтида — «Атлетико» Мадриднинг янги стадиони «Ванда Метрополитано»да бўлиб ўтади. Ажабмас, «Реал» ўз она шаҳрида ўтадиган навбатдаги финалда ҳам ғалаба қозонса…

Европа чемпионлар лигаси — 2017/18
«Реал» Мадрид (Испания) – «Ливерпуль» Англия 3:1 (0:0)

26 мая, Киев. «Олимпийский» МСЖ. 61561 томошабин
Голлар: 1:0 – Бензема (51), 1:1 – Мане( 55), 2:1 – Бэйл (64), 3:1 –  Бэйл (83).
Реал Мадрид: Навас, Карвахаль (Начо, 37), Варан, Рамос, Марсело, Модрич, Каземиро, Кроос, Иско (Бэйл, 61), Бензема (Асенсио, 89), Роналду.
Ливерпуль: Кариус, Александер-Арнолд, Ловрен, ван Дейк, Робертсон, Вейналдум, Ҳендерсон, Милнер (Жан, 83), Салаҳ (Лаллана, 30), Фирмино, Мане.
Огоҳлантириш: Мане (82).
Бош ҳакам: Милоад Мажич (Сербия)