Трамп Россияни «Катта саккизлик»ка қайтаришни таклиф қилди

АҚШ президенти Дональд Трамп Россияни яна «Катта саккизлик» таркибига қайтаришга чақирди. Бу ҳақда Associated Press хабар тарқатган.

Ўз навбатида Reuters агентлиги Трамп Канаданинг Квебек шаҳридаги G7 саммитида Россия ҳам бўлиши кераклиги ҳақида гапирганини хабар қилган.

«Сизга ёқадими ёки йўқ — бу сиёсий жиҳатдан ҳам беадаблик ҳисобланиши мумкин — аммо биз дунёни бошқаришимиз керак. Ҳозир G7 бор, аввал G8 эди, Россия ҳайдалганди, аммо Россия қайтарилиши керак, бизга бу давлат музокаралар столида бўлгани яхши», деган АҚШ президенти журналистларга.

Айни вақтда «Катта еттилик» Германия, АҚШ, Канада, Япония, Франция, Буюк Британия ва Италия давлатларидан иборат.

Россия ушбу ташкилотга 2002 йилдан 2014 йилгача аъзо бўлган, 2014 йили Қримни ўз таркибига қўшиб олганидан кейин ташкилотдан чиқариб юборилганди.