Чордоқдан топилган эски ваза 16 млн еврога сотилди

Фото: @sothebys

Ўнлаб йиллар давомида чордоқда пойабзал қутиси ичида чанг босиб ётган чинни ваза 16,2 млн еврога сотилди.

Парижда Sotheby’s аукционида сотувга қўйилган ваза учун муросасиз кураш кечган. Савдо аукцион учун ноодатий узоқ вақт – 20 дақиқача давом этган. Ваза учун таклиф қилинган максимал қиймат баҳоловчиларнинг прогнозидан 20 марта кўпроқни ташкил қилган. Таъкидланишича, Франциядаги Sotheby’s аукционларида ҳали бирор буюм бундай узоқ вақт сотилмаган.

Ваза аввалги эгаларига меросга қолган. Вазани топган аёл уни мутахассисларга кўрсатишга қарор қилган. Аёл бебаҳо вазани керакли жойга пойабзал қутисида етказган.

“У қутини стол устига қўйганда ва биз қутини очганимизда, буюмнинг чиройи барчани ҳайратлантирди”, деб эсламоқда мутахассис. Баландлиги 30 см бўлган вазани турли безаклар қоплаган бўлиб, Хитойда 1736-1795 йиллар яшаган Айсингёро Хунли императори белгиси вазани 18-асрга мансублигини билдирган. Ваза Францияга тушишдан олдин Цин сулоласига тегишли бўлган.