Тадбиркорлик субъектлари учун Савдо-саноат палатасига аъзолик ихтиёрий бўлади

Кичик бизнес ва хусусий тадбиркорлик субъектларининг Ўзбекистон Савдо-саноат палатасига аъзолиги ихтиёрий бўлади. Бу ҳақда Олий Мажлис Қонунчилик палатаси матбуот хизмати хабар қилмоқда. Олий Мажлис Қонунчилик палатасининг жорий йил 12 июнь куни бўлиб ўтган мажлисида “Ўзбекистон Республикаси Савдо – саноат палатаси тўғрисида”ги Қонуни ҳам янги таҳрирда қабул қилингани ҳақида аввал хабар берилган эди.

Қонун лойиҳасини иккинчи ўқишга тайёрлаш жараёнига тадбиркорлар, амалиётчи олимлар ва жамоат ташкилотлари вакиллари жалб қилинди ҳамда қизғин муҳокамалар ўтказилди.

Тадбиркорлик ташаббусини амалга ошириш учун қулай шарт-шароитларни таъминлаш, бизнес ҳамжамияти ҳамда давлат ҳокимияти ва бошқаруви органлари, бошқа ташкилотлар ўртасида ўзаро манфаатли шерикликни ривожлантириш, тадбиркорлик субъектларининг ҳуқуқлари ва қонуний манфаатларини ҳимоя қилиш кафолатларини кучайтириш, ишбилармонлик ва инвестиция муҳитини яхшилашга ҳар томонлама кўмаклашиш, тадбиркорлик субъектларининг ташқи иқтисодий фаолиятини барча чоралар билан қўллаб-қувватлаш Савдо-саноат палатасининг асосий вазифаси этиб белгиланди.
Мазкур қонунда палатанинг функциялари белгилаб берилди, палатанинг давлат органлари ва бошқа ташкилотлар билан ҳамкорлиги, палата фаолиятини ташкил этиш, шу жумладан палатага аъзолик масалалари тартибга солинди. Унга кўра, Ўзбекистондаги кичик бизнес ва хусусий тадбиркорлик субъектлари учун палатага аъзолик ихтиёрий қилиб белгиланди.

Айни вақтда мазкур қонун лойиҳаси ҳужжати Сенатга кўриб чиқиш учун юборилган.